Shillong, Nailar 30 : U Lamphang ka ïingdorbar Thaw Aiñ ka Jylla u Thomas Sangma ula pyntip ba la buh thong ba ka jingtei pyndep ïa ka ïing Dorbar Thaw Aiñ ba thymmai ka Jylla ka lah ban long hapoh une u snem ba mynta bad ka dor ban pyndep ïa kane ka ïing Dorbar Thawaiñ ba thymmai ha Mawdiangdiang ka la kiew sha ka 200 klur tyngka.
Haba ïakren bad ki nongthoh khubor, u Lamphang ula ong ba ki kam ki la ïaid watla ki don katto katne ki jingeh ki bym lah ban kiar.
Ula ong ba ka jingpynkhuid ïa kiba sah naka jingkhyllem u dome bad ka jingmynjur ïa ka design jong u dome ba thymmai ki la dep lut mynta bad ka kam kala iaid shakhmat.
“Mynta ka kam ka la ïaid shakhmat bad ngi kyrmen ba ka ïing Dorbar Thaw Aiñ ka Jylla kan dep noh hapoh ka shisnem” ula ong.
U Thomas ula bynrap “Namar baroh kito ki jingjia kiba jia…namar ka jingrai kyrkieh, ngam kwah shuh ban buh ïa kum kane ka jingma..Ta ka daw, hapoh une u snem, ngi dei ban pyndep noh ïa ka jingtei”.
U Lamphang ula pyntip ba ka jingpynïeng ïa u dome ba thymmai ruh kala sdang. “Ka la don ka jingpynkylla hynrei u dei uba kham sting ym ka design kaba rim kaba khia haduh 3000 metrik ton hynrei mynta te ula duna bha”.
Haba kylli, u Thomas ula pyntip ba ka project ka la mad ïa ka jingkiew dor. “Na ka T.141 klur bala mang mynshwa, mynta ka jingmang ka la kiew sha ka T. 200 klur” ula ong.
