Ki paidbah ka jylla kim pyrshah ïa ka Rel hynrei ki sngewkhia ïa ka Influx: Conrad Sangma

Shillong, Lber, 23: U Myntri Rangbah ka Jylla u Conrad K Sangma ha ka sngi Thohdieng u la ong ba ka Sorkar Jylla ka la pyrshang ban tem ïa ka jingwan rung kyrthep jong ki mynder ri khnang ban plie lynti na ka bynta ban pyntreikam ka Railway projek ha ka jylla.
Ha ka jingïakren bad ki lad pathai khubor u Sangma u la ong ba ki paidbah ka Jylla kim pyrshah ïa ka Rel hynrei ki sngewkhia ïa ka jingwanrung kyrthep jong ki mynder ri bad ïa ki lad jingïada ïa ki ritpaid.
“Baroh ki sngewthuh ïa ka jingdonkam jong ka Rel bad ki paidbah kim pyrshah eiei bad dei na kata ka daw ba ngi ïakren bad ki kynhun bapher bapher ban sngewthuh bad ban wad ïa ki lad ki lynti kumno ban kynjoh sha ka thong khnang ban pynthikna ba ngi dei ban ïoh jingïada bad ban don ruh ïa ki kyndon ban tem ïa ka jingwan rung kyrthep ki mynder ri bad ka jingdon ka Rel kan kyntiew ïa ka ïoh ka kot ha ka jylla bad ka ri ruh kan ïoh jingmyntoi,” u la ong.
Lah ban kdew hangne ba ka Sorkar Pdeng ka la tyrwa ar tylli ki Railways Project ha ka jylla, kata, ka 22-km Tetelia-Byrnihat Track bad ka 108-km Byrnihat-Shillong Line.
Ïa ka Tetelia-Byrnihat project yn shna ha ka jinglut kaba kot T. 496 klur. Hynrei, kine ki projek ki la shu sahkut na ka daw ka jingpyrshah kaba jur na kiba bun ki kynhun bad kynthup ruh na ki sengbhalang.
Haba kyllli, u Myntri Rangbah u la kubur ba dei tang ka Inner Line Permit (ILP) kaba long ka lad ka lynti ban pyrkhing ïa ka jingwan rung kyrthep jong ki mynder bad ong ba dei na kane ka daw ba la mynjur ïa ka Resolution hapoh ka Ïingdorbar Thawaiñ ka jylla da kaba kyntu ïa ka Sorkar Pdeng ba kan ai jingmynjur ban pyntreikam ïa ka ILP.
“Lada ngi ïoh ïa ka ILP kata kan jin da la bha shikatdei eh hynrei lada ngim ïoh kumno ngin ïaid shakhmat. Ïa kine ki jyrwit jyrwat ngi la ïakren namarba ki paidbah hi kim pyrshah ïa ka jingwan ka Rel, hynrei ka daw tynrai hi ka dei halor ka jingwanrung kyrthep jong ki myndei ri bad ban ïada ïa ka snap ba kyrpang jong ngi,” u la ong.
Ha kaba ïadei bad ka jingtyrwa ban wanrah ïa ki surok Rel, u Sangma u la pyntip ba ka Sorkar kam pat ïoh pdiang satia ïa ka No-objection certificate (NOC) na ka Khasi Hills Autonomous District Council (KHADC).
“Nga la shimkhia ban ïakren bad u Myntri ka tnat Railway ka Sorkar India bad nga la kyntu ba ïa kine ki kam dei ban ïasyllok lang bad ki kynhun bapher bapher,” la ïathuh u Conrad.
U la ïathuh ruh ha ka jingleit ba khatduh jong u sha New Delhi, u Myntri u la pynpaw ba u Myntri Rangbahduh ka ri u Narendra Modi u don ka jingsngewkhia bad u la ong ba u angnud ban ïohi ba baroh ki nongbah jong ki jylla hapoh ka ri kin pynïasoh bad ka lynti Rel khnang ban pynkyntiew ïa ka ïoh ka kot jong ki paidbah ha baroh ki liang.