Shillong, Lber 24 : U Myntri Rangbah ka Jylla u Conrad K Sangma, mynta ka Sngi Thohdieng ula ong ba u Lamphang ula pynwai ïa ka Dorbar jong ka Dorbar Mang tyngka mynta shiteng sngi kat kum ki kyndon aiñ pynïaid ïing Dorbar hi..
“….ka rule book ka la kdew shai ba ha ka Sngi Thohdieng, ka ïingdorbar kan shong tang naduh ka por 10 baje mynstep haduh 12 baje shiteng sngi” ong u Conrad haba ïakren bad ki nongthoh khubor.
Kane ka jingkynthoh u CM kala mih hadien ka jingpynpaw ïa ka jingpyrshah jong ka Voice of the People Party (VPP) halor ka jingaipor haba byrngem ruh ban mih sha surok halor ka kam ba ïadei bad ka jingpyntreikam ïa ka roster system jong ka bhah thungkam thungjam ha Jylla.
“Katto katne ki Liang Pyrshah kiba ban jur la bun sien halor ka kyndon aiñ pynïaid ïing dorbar bad ong ba dei ban bud ïa ka ki kyndon bad kane ka dei kaba u Lamphang ula leh. Ula ïaid kat kum ka kyndon pynïaid dorbar, kat kum ka rai jong ka Business Advisory Committee (BAC) bad baroh ki mat kiba la kdew ki dei kiba la pynshong nongrim na kane” ula ong.
U Myntri Rangbah ula ong ba ki don bun ki khep ba ki Liang Pyrshah ki lah ban kren halor kane ka kam (roster system).
“Kan don ka jingïatai halor ka jingkren u Lat, kan don ka jingïatai halor ka mang tyngka, ka lah ban don ka special motion, ka lah ban don ha jingïatai ba lyngkot-ki don bun ki lynti. Namar kata, ki dkhot ki ïoh laitluid ban pynsngew ïa kano kano ka kam ha kano kano ka por” ula bynrap.
Halor ka jingkynnoh ka VPP, u Conrad ula ong “….baroh ki kam kiba la wanrah, ngi ju ïakren beit ïa ki, ngim ju kiar ïalade na kine bad hadien habud ruh ngin nym kiar ïalade ban ïatai ïa kano kano ka kam”.
