Shillong, Lber, 24: U Myntri Rangbah ka jylla u Conrad K Sangma ha ka sngi Thohdieng u la ong ba ka jingthung ïa ki Consultant ka long kaba donkam haba pyntreikam ïa ki Externally Aided Projects (EAP) bapher bapher bad ïa ki kam jong ki tnat treikam bapher bapher ka Sorkar Pdeng hapoh ka jylla.
Haba kylli halor ka jingdonkam ïa ka Sorkar ban pynlut bun ka pisa halor ka jingthung palat 161 ngut ki Consultants, u Sangma u la ong, “ki tnat treikam bapher bapher jong ka Sorkar India haba pyntreikam ïa ka PMGSY, ka Smart City Project, bad kiwei kiwei ki tnat treikam ka long kaba donkam ban thung ïa ki Consultant.”
“Wat na ka bynta ki Externally Aided Project kiba dang ïaid shakhmat, ka long kaba donkam ban thung ïa u Consultant na ka bynta ki jingtrei bapher bapher khnang ban pynïaid beit ïa ki kam ha ki tnat treikam,” ula bynrap.
U la pyntip ba ka Sorkar ka la pynlut T. 250 klur tang ban siew bainong ïa ki consultant ha ki san snem kaba long T.50 klur la pynlut ha ka shi snem.
“Ka pisa kaba kot T. 250 klur la sngew ba ka bun bha hynrei lada phi khate ïa ki snem, ki bnai bad ïa ka jingdon jong ki projek kiba dang trei ka poi la kumno kuno T.20 lak ha ka shi bnai ïa kaba la pynlut da ki tnat treikam ha manla kawei pa kawei ka projek,” la ong u Sangma,
Shuh shuh u Myntri Rangbah u la pyntip ba kine ki Consultant ki dei kiba peit ïa ki jingtrei kiba kot palat T.16,000 klur shaneng kumba la bthah da ki Ministry bad ki EAP. Na kine, T. 12,000 klur tam ki dei na ka bynta ki EAP, T. 1,000 klur ki dei na ka bynta ki Smart Town Project, T.3,000 klur na ka bynta ka PMGSY bad kumta ter ter.“Ka long kaba shongnia haba kheiñ ïa ka jingpynlut na ka kam ba la pyntrei,” u la ong. Nalor kata, u Sangma u la ong ba ka jingpynlut ka wan hi na ki EAP bad ym na ka khajna ba la lum da ka Sorkar. “Ka dei ka bynta jong ka projek bad kumjuh ruh na ka bynta ki smart town projects bad na ka bynta ka PMGSY.
