Bym ailad u Speaker ha Assembly, byrngem ïakhih ka VPP halor ka Roster System

U Speaker um shym la burom ïa kaba la ïakren: Congress

0

Shillong, Lber 24: Ki MLA ka Seng VPP ki la byrngem ban leit sha u paidbah bad ban pynlong da ka jingïakhih namar ka jingbym ailad u Speaker ka ïingdorbar Thawaiñ, u Thomas Sangma ban ïakren mynta ka sngi halor ka Roster System.
Ïa kane la ïathuh da u Bah Ardent Miller Basaïawmoit, President ka VPP ryngkat ka jingïadon lang u Bah B. Marbañiang, MLA Mawlai bad u Bah HS Kharpran, MLA Mawryngkneng hadien ba u Speaker u la pynwai noh ïa ka jingïashong dorbar tang ha ka por 12 baje mynsngi.
U Bah Ardent u la ong ba ka jingshisha mynta ka sngi kadei ka Sngi jong ki Dkhot ka ïing ban wanrah ïa ki mat ïakren bad ka la don ruh ka Motion halor ka jingktah ka Roster System. Hynrei u Speaker kynsan kynsan ha ka por 12 baje katba dang jubab u Myntri ka tnad PHE, u Marquise Marak, u la pynsangeh noh ïa ka Dorbar. U MLA Nongkrem u la ong ba ñiuma ki kyndon ki ong ba ha ka sngi thohdieng ka dorbar kan long tang haduh ka por 12 baje mynsngi. Hynrei ka dorbar borabor kam ïaid tang katkum ki kyndon, ka îaid ruh da ki rukom leh ne ki ei kiba ju leh ne ki convention.
Mynta ka sngi lei kadei ka mat kaba donkam bha ban ïakren namar ka Roster System kaba la wanrah da ka sorkar halor ka jingbthah ka ïingbishar kadei ka mat ka ba la ktah palat ïa ki samla bad ka don ka jingkhñium kaba jur na ki paidbah. “Nga lyngngoh balei u Speaker um pan jingmut na ki dkhot ka Liang Pyrshah shuwa ba un pynwai kumba ju leh na ka por sha ka por, hynrei u la shu pynwai kynsan kynsan”, la ong u Bah Ardent, da kaba bynrap ba kane ka dei ka jingthmu jong ka sorkar ban kiar na kaba ïakren ïa kane ka mat kaba la ktah shisha ïa ki Samla.
U la ong ba haba kum ki dkhot ki kwah ban ïakren ïa kane ka mat hapoh ïingdorbar kum kita ki nongmihkhmat, hynrei haba ym ïoh lad ym banse ban leit sha u paidbah, haba ngi mihkhmat ïa u paidbah.
U Bah Ardent u la ong ba ka mat kaba u la buh ka long, “Ka jingdonkam kyrkieh ban pynsangeh shuwa ïa ka jingtreikam ka Roster System”, kaba mut kadei ka kam kaba kyrkieh u la ong.
Lah ban kdew hangne ba wat lada ki kyndon ki ong ba ha ka sngi thohdieng ka dorbar kan long tang haduh ka por 12 baje mynsngi, hynrei ha ki snem kiba ladep, namar ka jingbun ki kam, ka dorbar ka bteng haduh ka por 2 baje ruh bad palat ïa kata ruh.
“Ngi ïoh por tang 7 sngi ban shong dorbar mang tyngka bad ka por ban ïatai ïa ka jingkren u lat ruh ka long tang mar shiphew minit. Nalor ba ka por Private Member Buisness ka long tang 2 sngi. U Speaker u ladei ban bteng ïa ka jingïashong dorbar mynta ka sngi”, la ong u Bah Ardent.
U Dr. Celestine Lyngdoh, MLA ka Congress u la ong ba ha ka por ba shna ïa ka Calendar ban shong dorbar, ki MLA ka liang pyrshah ki la pdiang ïa ka jingkyrpad ka sorkar ban long ka dorbar kaba khyndiat sngi namar ba ki ophisar ki bunkam financial year, hynrei la ïasngewthuh jingmut pat ban pynjlan ïa ka por ban shong dorbar. Hynrei u Speaker um shym la burom ïa kane bad wat haba u MLA Nongkrem u la rah kti ban pyni dak ha ka por ka por ba pynkut ïa ka dorbar, hynrei u Speaker um shym la burom.
Na ka liang u Myntri Rangbah, u Conrad Sangma, u la ïada ïa ka jingleh u Speaker da kaba ong ba u la leh katkum ki kyndon pynïaid Dorbar. U la ong ruh ba ki Liang Pyrshah ki lah ban wanrah ïa ki mat ha kiwei pat ki sngi shong dorbar kum ha ka jingïatai ha ka jingwanrah ïa mang tyngka bad kiwei kiwei.

Leave A Reply

Your email address will not be published.