Shillong, Lber 24: Ka jingpyrshah jong u Rahul Gandhi ïa ka rai jong ka sorkar UPA II ba la ïalam da ka Congress hapoh ka jinglong Myntri Rangbahduh u Manmohan Singh ban wanrah da ka ordinance ban ïada ïa kino kino ki MLA, MP na shah mait kyrteng lada dei ba ki shah rai pynrem ban set phatok palat ar snem ha ka ïing bishar ka la pynlong ïa u ban ngat ha kane ka apot ha kane ka kynti kaba mynta.
Lah ban kdew hangne ba ka Supreme Court jong ka ri India ha ka 10 tarik Naitung 2013 ka la pyndam ïa ka Section 8(4) jong ka Representations of Peoples Act, 1950 namar ka long pyrshah ïa ka riti synshar (unconstitutional) ha ka jingai rai bishar ïa ka mokotduma Lily Thomas vs Union Of India & Ors ((2013)
Ha ka rai bishar jong ki arngut ki nongbishar u Justice A.K. Patnaik bad u Justice S.J. Mukhopadhaya ka la rai ba kino kino ki MLA ne MP kiba la shah rai pynrem ha ka kashari ïa ka jingdonkti jong ki ha ki kam bymman kaba ka jingsaja kam dei ban duna ïa ka arsnem ban shong phatok kin shah mait kyrteng noh marmar mar sien mih ka jingsha rai pynrem.
Na ka liang ka sorkar UPA II hapoh ka jingïalam u Manmohan Singh ha kato ka por ka la wanrah ïa ka ordinance ban pynlait ïa ki MP ne MLA ban shah mait kyrteng lada ki shah rai pynrem ha ki kam bymman jong ki bad kin dang lah ban bteng ïa ka jinglong MLA ne MP da lai bnai khnang ba kin lah ban ujor pyrshah ïa ka rai shah pynrem jong ki, HYNREI na ka Liang u Rahul Gandhi u la pyrshah jur ïa kane ka jingthmu ka sorkar UPA II bad ong ruh ka dei ka rai khlieh biej jong ka sorkar bad tar ruh ïa ka kopi jong kane ka ordinance ha khmat ki nongthoh khubor.
Jin lada u Rahul Gandhi ha u 2013 um pyrshah ïa kane ka rai jong ka sorkar UPA ha kato ka por ka apot shah mait kyrteng jong u kan ym pat jia ha kane ka kynti kaba mynta.
