New Delhi, Lber 24: U Nongïalam ka Congres uba long ruh u MP sha Lok Sabha na Wayanad, Kerela u Rahul Gandhi ha ka sngi Thohdieng u la shah mait kyrteng noh kum u MP shisngi hadien ba ka Kashari u Chief Judicial Magistrate (CJM), Surat ka la rai pynrem halor ki kam bymman ban ai ka saja da ka jingset phatok ba 2 snem halor ka jingkren ïalap elekshon jong u ha u snem 2019 ha kaba u la kam ba kiba bun ki nongtuh kiba paw ki dei kiba don ïa ka jait Modi kum u Nirav Modi, Lalit Modi, Narendra Modi.
Na ka liang u Secretary General ka Lok Sabha Secetariat u Utpal Kumar Singh ha ka sngi Thohdieng u la pynmih ïa ka hukum ba u Rahul Gandhi u MP sha Lok Sabha uba jop na Wayanad, Kerela la mait kyrteng noh kum u MP kat kum ka Article 102 (1) (e) jong ka Constitution bad kumjuh kat kum ka Section 8 jong ka Representation of the People Act 1951 namar la rai pynrem ïa u ban shah set pahatok ar snem kynthih da ka kashari.
Lah ban kdew hangne ba u Rahul Gandhi katba u dang ïalap elekshon ha Kolar, Karnataka ha ka 13 tarik u Ïaiong 2019 u la jer ba u Nirav Modi, Lalit Modi, Narendra Modi ki la dei ki nongtuh ba shyrkhei ha ka ri, ‘balei keiñ kine ki nongtuh ki dei beit na kajuh ka jait (Modi) bad lada ngin dang wan jingtip shuh ngin dang lap bun bah ki Modi kiba kum kine’ la ong u Rahul ha ka jingïalap elkehson.
Na ka liang u Purnesh Modi u MLA na Gujarat ha ka 16 tarik Ïaiong 2019 u la ujor mokotduma mynraiñ khmat ha kashari pyrshah ïa katei ka jingkren u Rahul, ‘namar kum kane ka jait jingkren ka la pynlehraiñ bad ktah mationg lut ïa ngi baroh kiba dei ka jait Modi, u la ong.
Ka kashari u H.H. Varma ha ka sngi Palei hadien ka jingshong bishar kaba la neh da ki snem ka la ai ïa ka rai bishar kaba rai pynrem ïa u Rahul Gandhi ban set phatok 2 snem ryngkat ka kuna kaba T. 15,000 hajar tyngka hapoh ka Sections 499 bad 500 jong ka Indian Penal Code.
Hadien ba ka Kashari ka la rai pynrem ïa u Rahul Gandhi marmar tang hadien shisngi la mait kyrteng noh kat kum ki kyndon kiba la kdew sha khmat.
Hynrei na ka liang ka kashari ka la ai jamin noh ïa u Rahul Gandhi na bynta 30 sngi ba u lah ban ujor pyrshah ïa kane ka rai bishar jong ka.
Na ka liang ki katto katne ki riew stad aiñ ki la pynpaw ba kane ka jingshah mait kyrteng u Rahul ka dei kaba ym lah shuh ban lait namar la rai pynrem da ka kashari bad kane ka hukum shah mait kyrteng ïa u Rahul un lah ban lait tang lada ka kashari kaba kham hajrong kan pyndam noh ïa kane ka hukum rai pyndam jong ka kashari jong u CJM Surat.
U Myntri barim ki kam aiñ uba long ruh u dkhot bad u MP barim ka Congress, u Kapil Sibal u la ong, “U Rahul u dei ban shah mait kyrteng namar la rai pynrem ïa u ban set phatok ar snem bad tang lada ka kashari kaba hajrong ka pyndam ïa ka rai bishar ka kashari CJM un ïoh long dkhot biang hynrei lada ym kumta ym tang ba u shah mait kyrteng hynrei un ym lah ïakhun elekshon shuh haduh 8 snem naduh ba la ai ïa ka rai bishar ban pynrem ïa u.
Na ka liang ka Congress ka la ong ba kane ka jingshah mait kyrteng jong u Rahul ka dei ka sngi kaba dum tam jong ka synshar paidbah bad ka jingïap duh ruh ka synshar paidbah ha India hapoh ka jingleh ka BJP.
“Nga ïakhun na bynta ka mynsiem ka India (synshar paidbah) bad ngam pyndem da leilei nga long uba la kloi ban siew ïa ka dor la ha kano kano ka dur,” ong u Rahul Gandhi ha ka Twiter jong u hadien ba la pynmih ïa ka hukum mait kyrteng ïa u.
Lah ban ïohi na ka liang ki nongïalam ki seng saiñ pyrtheiba don ha ka liang pyrshah ba kynthup naduh u Stalin jong ka DMK, ka Mamata Banerjee jong ka TMC, u Arvind Kejriwal nongïalam ka AAP, u nongïalam ka BRS K Chandrashekar Rao, u nongïalam ka Samajwadi Party u Akhilesh Yadav, u nongïalam ka JMM u Hemant Soren, u Uddhav Thackeray nongïalam ka Shiv Sena (UBT), ka nongïalam ka NCP ka Supriya Sule bad kiwei kiwei ki nongïalam saiñ pyrthei kiba la pynrem ïa kane ka jingshah mait kyrteng u Rahul Gandhi.
