Ym pat pynkhreh ka Sorkar yn leh kumno lada jia ba dkut kynsan ka jingkieng Dam
Sngewkhia jur ki MLA ka Liang Pyrshah bad Sorkar
Shillong, Lber 24: Ka jingkieng ha Pung Umïam kaba den ïa ka Wah Umïam ka la dap 58 snem ka rta bad katkum ka jingbuh por ki Engineer ba shna ïa ka, ka la kut ka por ba kan lah ban shan haba ïaid ki kali ba khia. HYnrei na ka liang ka sorkar haduh mynta kam pat don kino kino ki jingpynkhreh lypa kumno kan leh lada jia ba kane ka jingkieng ka dkut kynsan kynsan.
U Myntri ka tnad bording, u Abu Taher Mondal haba ïa ki jingkylli ba la wanrah da ki MLA ka liang Pyrshah u la ong ba kam pat don kano kano ka jingpynkhreh kum ka jingai jingmaham lypa, khamtam ïa ki jaka ba don sharum jong kane ka Dam. Hynrei u la ong ba la aiti lang ha ka Central Water and Power Research Commission (CWPRC) na Pune bad ka IIT Guwahati ba kin pynkhreh, namar kine kidei kijuh ki bor ba la aiti ban wad ïa ki lad ki lynti kumno ban pynïaid kali ynda la moramot ne pynpra noh ïa kane ka jingkieng kaba mynta ka la sator.
Ha shuwa jong kane, u Bah B. Marbañiang, MLA ka Mawlai, u la kylli hato ka sorkar ka la don lypa ne em ki jingpynkhreh lada jia na kane ka jingkieng ka dkut kynsan kynsan ne ba ka Dam ka bthei kynsan kynsan.
U Bah Ardent Basaïawmoit, MLA Nongkrem, u la ong balei ba ka sorkar kam buh da ki CCTV, khnang ba ki bor Pulit bad Magistrate kiba ap pahara ha kane ka jingkieng, kaba ka sorkar ka la buh ba ym dei ban kit palat ïa ka 20 Metric Ton kin nym bam pisa bad shah ïa ki trok ban kit palat pud ban ïaid la ka ïaid.
Kiwei kiwei pat ki MLA ka Liang Pyrshah bad kumjuh ruh ki MLA ka Liang Synshar kum u Bah Mayralborn Syiem, MLA ka UDP na Nongpoh, ki la ïeng ban kylli bad pan jingpynshai bha na u Myntri halor ka jingma kaba ap ïa kane ka jingkieng.
U Mondal ula ïathuh ba nyngkong la mut ban shna noh da kawei ka surok na syndah jong kane ka jingkieng, hynrei ka Geological Survey of India (GSI) ka la khang ïa kane bad ai jingmut ban shna noh na ka bynta kaba kham shaneng. Mynta la nang pynkhreh ïa ka DPR bad ka jingkhot tender ruh lah dep. Ha kajuh ka por u Myntri u la ïathuh ba ka jingkhynñiuh jong ka jingkieng ïa mynta ka dang lah ban bat lada ïa ki kali kiba kit katkum ka jingkhia ba la bih da ka sorkar.