Ki nongtrei ka Koit ka Khiah ki dei ki nongïakhun ban pynkut ïa ka jingpang TB: Dr. Ampareeen

0

Shillong, Lber, 28: “Ki nongtrei jong ka tnat ka Koit ka Khiah ki dei ki nongtbeh jingshai ban pynkut noh ïa ka jingpang Tuberculosis (TB) shwa jong u snem 2025, kaba long ryngkat bad ka thong ba la buh da ka National Strategic Plan (NSP) na ka bynta ka jingpang Tuberculosis (2017-2025) ban kynjoh sha ka thong ban pynkut noh ïa ka jingpang TB shwa u snem 2025.” ong ka Myntri ka Koit ka Khiah ka Sorkar Jylla ka Dr. Mazel Ampareen Lyngdoh haba kren ha ka jingrakhe ïa ka World Tuberculosis Day 2023 ha ka sngi Baar halor ka phang “Yes! We can End TB” ha ka jingïalang kaba la long ha u Soso Tham Auditorium, Shillong.
Ïa kane ka jingrakhe la pynlong da ka ophis jong u Mission Director, National Health Mission, Meghalaya.
Ka Dr. Ampareen ka la ong ruh ba ka jingpang Tuberculosis ka dei ka jingpang kaba buh jingma bha ïa ki briew namarba ba ka la shim ruh ïa kiba bun ki mynsiem briew hynrei watla katta ka dei pat ka jingpang kaba lah ban ïada bad ban pynkoit da kaba dih tista ïa ki dawai katkum ba la bthah da ki doktor.
Ka khot bad wer ïa baroh ban ïasnoh kti lang na ka bynta ban ïakhun thma pyrshah ïa kane ka jingpang bad ka la pynpaw ruh ïa ka jingkyrmen ba yn dup lah ban pynduh noh ïa kane ka jingpang da ka jingphaikhmat lem jong ka sorkar khnang ban kynjoh sha ka thong ba la buh da ka National Strategic Plan (NSP).
Ka la banjur ruh ïa ka jingïatreilang jong ki paidbah ha ki shnong ki thaw bad ban weng noh ïa ki jingngeit biej shaphang ka jingpang TB bad ban pynthikna ba dei ban don ka jingpynshai paidbah khnang ban ïoh ïa ka jingjop.
Ha kane ka sngi, ka Myntri bad ki kynrem ki lyndan ki la aiti ïa ka Sub-National Certification sha ka East Khasi Hills District na ka bynta ka jingjop ïa ka takma Rupa kaba kit ïa ka song pisa kaba T.3 lak bad ka takma rnong kaba kit ïa ka song pisa kaba T.2 lak ïa kaba la ai sha ka West Jaiñtia Hills, ka West Garo Hills bad ka West Khasi Hills district.
La sam ruh ïa ki khusnam sha ka Ri-Bhoi, East Garo Hills bad South Garo Hills district da ka NHM, Meghalaya namar ka jingtrei shitom jong ki ban wad ïa ki lad ki lynti ban pynduna ïa ka jingdon jong kiba pang TB. Kane ka khusnam ka kynthup ïa ka syrnot bad ka song pisa kaba T. 50,000.
Ïa ka khusnam la sam ruh sha ki nongjop ha ka jingïakop dro na ka bynta ka kyrdan Junior bad Senior bad ïa ki nongpang TB kiba la ïoh biang ïa ka jingkoit jingkhiah kaba pura.

Leave A Reply

Your email address will not be published.