Lah ban ym pdiang ki Hospital hapoh Jylla ïa ka dor sumar jong ka CGHS: Dr. Ampareen

Shillong, Lber, 28: Ki Hospital kiba don hapoh ka jylla ki lah ban ym pdiang ïa ka dor ba la buh da ka Central Government Health Scheme (CGHS) ha kaba ïadei bad ka jingai jingsumar sha ki nongpang, ong ka Myntri ka Koit ka Khiah ka Sorkar Jylla ka Dr. M. Ampareen Lyngdoh hapoh ka iingdorbar thawaiñ ka jylla ha ka sngi baar.
“Ka dor ba la buh da ka CGHS ka dei kaba rit bha ban ïa ka dor ba la buh da ki hospital namarkata ki hospital kin ym mynjur ba kata ka dor bad ka jingïapher ka long kumba 70%,” la ong ka Dr. Ampareen Lyngdoh haba jubab ïa ka jingkylli ba la wanrah da u MLA jong ka VPP na North Shillong u Bah Adelbert Nongrum.
“Ngi ladep thoh sha ki hospital hynrei haduh mynta kim pat ai satia ïa kano kano ka jubab,” la bynrap ka Myntri.
Katkum ka jingong jong ka, ïa mynta dei tang ka North Eastern Indira Gandhi Regional Institute of Health & Medical Sciences (NEIGRIHMS) Hospital kaba la pyntreikam ïa ka dor jong ka CGHS hapoh ka Jylla.
Ka Myntri ka ka la ïathuh ba ka dor ba la buh da ka CGHS ha baroh kawei ka ri India ka long salonsar bad ka dei ka bym pat pynthymmai la slem bha.
“Ngin ailad ïa ka Sorkar India ba kan pynthymmai ïa ka dor jong ka CGHS kumba ka la leh mynshwa ha ki snem 2005-06,” ka la bynrap
Ka la ong, kan long kaba bakla na ka bynta ki dkhot jong ka ing ban ong ba ka Sorkar kam sngewkhia ïa kane ka mat.