Ki liengsuiñ kamai na kylleng ki bynta jong ka Ri shen kin sa hiar ha Umroi: CM

Ym slem ban her ki liengsuin na Shillong - Tura

0

Shillong, K’Lyngkot 15 : U Myntri Rangbah ka Jylla, Conrad K Sangma ha ka sngi Balang u la ong ba ha kawei ka sngi ki liengsuiñ kamai na kylleng ka Ri kin sa noh khyndew ha kad liengsuiñ kaba don ha Umroi.
“Nga sngewskhem ba kan sa poi ka por ba ki liengsuiñ kamai kin sa hiar ha Umroi. Dang hynin ka sngi nga la dep ban ïa kren bad lashai bad lashisngi ruh ngan don jingïalang ha nongbah Delhi kumjuh ha ka taiew ba nyngkong jong u Rymphang ban don biang ka jingïalang halor kane,” ong u Myntri Rangbah haba kren bad ki lad pathai khubor.
U la ïathuh ba ka sorkar India ruh ka ai ïa ka jingkyrshan kaba pura.
“Nga kyrmen ba shen ki liengsuiñ kamai kin wan beit beit na Delhi bad na kiwei ki jaka ban hiar ha Umroi. Nga ngeit ruh ba ha kata ka por kan sa wallam ïa ka jingkylla kaba khraw bha ha ka jylla la ka long ha ka liang ki kam jngohkai pyrthei hynrei wat ha ka pule puthi bad ha ki liang baroh na bynta ka jingkiew jong ka jylla,” u la ong.
Nalorkata, u la ong ruh ba kane kan pynsuk shuh shuh ïa ki nongwan kai na kiwei ki jaka ban wan sha kane ka jylla.
“Watla ngam pat lah ban ong lano kan urlong la kan long mynta u bnai lane ha kane ka snem, hynrei nga kyrmen ba kan sa long kam noh shen,” bynrap biang u Myntri Rangbah.
Shwa kane u la ong ba ka la don ka jingsngew ba kane kan ym lah ban urlong hynrei da ka jingkut jingmut u la buh thong ba ka dei beit ban urlong bad kumta na ka sorkar ki la khot ïa ki riew shemphang ban peit halor kane ka bynta kaba roh ki ong ba ka dei ka bym lah ban long.
“Hynrei mynta da ka jingwan jong ki buit treikam ba thymmai mynta ka lah ban long bad mynta ki liengsuiñ Indigo bad kiwei ki liengsuiñ heh kum ka Spice ki la dep ban ai da ka jingthoh ba lada pynheh ïa ka runway bad pynbiang ïa ki kyndon kumba la buh da ka Airport Authority kin phah ïa ki liengsuiñ kamai jong ki ha Umroi Airport,” u la ong.
Ha kajuh ka por u la ïathuh ba ka sorkar jylla ka la trei shitom na ka bynta ban pynurlong ïa ka jingkamai ki liengsuiñ na Shillong sha Tura. “Ngi la shong bun bha ki jingïalang halor jong kane bad na ka sorkar India ruh ka kyrshan tangba ïa mynta ka dang kloi palat ba ngan ong ei ei tangba nga kyrmen ba kan sa urlong shen,” bynrap u Myntri Rangbah.

Leave A Reply

Your email address will not be published.