ïap lai ngut, mynsaw jur kawei ba hap ka kali Tata Sumo ha riat surok NH-6

Shillong, K’lyngkot, 15: Kawei ka kali Tata Sumo kaba dang wan na Guwahati ban leit sha Aizawl ryngkat bad ki saw ngut ki nongleit jingleit kynthup ïa u nongniah kali, ka la hap sha riat ka riat kaba jylliew kumba 200 phut ynda poi hajan ka Rattachera Police Check Post ha surokbah National Highway-6 ha East Jaiñtia Hills District.
Ha kane ka jingjia kaba la jia ha ka sngi Balang, u nongniah bad kawei ka kynthei kaba shong lang hapoh ka kali ki la khladnoh hashen, katba kawei pat ka la khladnoh ynda poi ha Umkiang PHC.
Ki shipai BSF jong ka 172 Battalion, Meghalaya tang shu ïoh jingtip halor kane ka jingjia ki la leit mar mar ban ïarap sei ïa kiba la khladnoh bad ïa kiba mynsaw na ka bynta ban pynkit sha Umkiang PHC ban ïoh jingsumar shwa ban pynkynriah sha Silchar Civil Hospital.
Ki lai ngut ki lanot kiba la khladnoh ha kane ka jingjia ki dei kiba la tip kyrteng kum u Nasim Ahmed Choudhury 25 snem ka rta uba sah ha Silchar, Assam, ka Zothanpari , 51 snem ka rta na Aizwal, Mizoram bad ka Jenny Lalrinthangi 33 snem rta na Mamit District jong ka jylla Mizoram.