Da ka surok suiñ naduh Umshyrpi ter ter sha kylleng ka nongbah Shillong pynkhreh ka sorkar

Shillong, K’Lyngkot 15 : U Myntri Rangbah ka Jylla, Conrad K Sangma dang shen u la kynduh ïa u Myntri ka tnad Road annd Surface Transport ka sorkar pdeng ban pynsngew ïa ka jingdonkam ka jylla ban don noh da ki surok suiñ (elevated road) ha kylleng ki bynta jong ka nongbah Shillong.
Haba pyntip ïa kane, u Myntri Rangbah ka jylla u la ïathuh ba ka jingthmu jong kine ki surok suiñ ka long ban pynïasoh ïa ki bynta ba kongsan jong ka Shillong naduh Umshyrpi ter ter shaduh Anjalee bad kawei pat ka surok kaban noh sha ki thaiñ Iewduh. Shuh shuh u ong ba kawei pat ka surok kan bteng ha ka surok bah bad ïaid ter ter shaduh jan Civil Hospital Shillong.
La ïathuh ba nangtei pat ka surok kan sa noh sha ka lynti ban leit sha ki thaiñ Jowai katba kawei pat ka surok kan noh sha ki bynta jong ka Meghalaya Secretariat.
“Kine ki surok suiñ (elevated road) ki long kiba donkam bha namar kawei kan pynitynnad ïa ka nongbah Shillong bad ha kawei ka liang pat kin long kum ki surok armala. Tangba kaba kham kongsan ka long ban don ïa ki surok kiba ki kali ki lah ban ïaid na jrong bad kumjuh ruh na shapoh,” ong u Myntri Rangbah haba kren bad ki lad pathai khubor.
Katkum ka jingïathuh da u Myntri Rangbah lada pyntreikam da kine ki surok suiñ kan ïarap haduh katta katta ïa ka dheng kali ha nongbah Shillong.
“Lashai ka sngi ngan kynduh biang ïa u Myntri ka tnad Road and Surface Transport ban ïahuh bniah shuh shuh halor kane ka projek,” u la ong.
Da kaba bynrap ba ha ka jingïakynduh kaba dang shu lah shen ki la dep ban ïakren halor kane ka surok, u Myntri Rangbah u la pyntip ruh ba ki la dep ban bthah ïa ka NHIDCL ban pynbiang ïa ki jingdonkam bad dei na kane ka daw u kwah ba dalade sa shisien pat ban leit buddien biang markhmat.