Ki kyndon ka Reservation Policy ka la noh shilang lypa naduh 1972 sha ki Garo: HNYM

Shillong, Ïaïong 14: Ka Hynniewtrep National Youth Movement (HNYM) ha ka sngi Thohdien ka la ther tyngeh ïa ka Achik Conscious Holistic Integrated Krima (ACHIK) halor ka jingdawa jong ka ba u snem 1972 un dei u snem ot kyrteng ne cut off year ha ka jingpyntreikam ïa ka Roster System.
Haba kren sha ki lad pathai khubor u President ka HNYM u Bah Louis Dohtdong u la kynnoh ba ki jaidbynriew Garo ki la kwah rhah shaba palat ban dawa ban pyntreikam ïa ka Roster System naduh u snem 1972.
“Ngi ïohi ïa ka jingdawa ka ACHIK ba u snem ot kyrteng na bynta ka jingpyntreikam ïa ka Roster ka dei naduh u snem 1972 bad ki la byrngem ruh ba lada ka sorkar ka pyntreikam ïa ka roster jong ka Reservation policy ym naduh u snem 1972 na ka liang jong ki kin leit ujor sha supreme Court hana ba ki shah knieh ïa ka hok jong ki paid Garo,” u la ong.
“Nga shu kwah ban pynkynmaw ïa ki paid Garo ba ki lei ki la dei kiba ïoh palat ban ïa kaba ngi ïoh na ka Reservation Policy namar kat kum ka para 3.4 jong ka Reservation Policy la ai kyrpang tang ïa ki Garo ïa ka lad ha kaba ïadei bad ka rukom rah ïa ki post ba la bhah na ka bynta jong ki haduh lai snem lada kim lah pyndap na ka daw ba ym don briew kiba apply bad ka jingai lad ba kat kino kino kiba dei ki jaidbynriew Garo wat la kim dei na ka jylla Meghalaya, ka jingkwah jong ki ban pyntreikam ïa ka roster naduh u snem 1972 ka pyni ïa ka jingkwah rhah jubor jong ki Garo,” u la bynrap.
U la ong ba katei ka jingailad ban rah ïa post kiba ym lah ban pyndap haduh lai snem kat kum ka reservation Policy ka dei beit thik tang ïa ki Garo katba ïa ki Khasi pat kam don satïa kaba kum kata ka bhah kyrpang.
“Nalor ba la ailad ba kin rah haduh lai snem ïa ki post ba kim lah ban pyndap la ailad kyrpang ruh tang ïa ki Garo ba lada ym don Garo na ka jylla ki Garo kiba dei na kawei pat ka jylla ki lah ban ïoh kam na katei ka bhah jong ki bad kane ruh kam don na ka bynta ki Khasi,” u la ong.
“Kat kum ka Para 3.5 pat la kdew ba lada dei ba ym don Garo ba lah ban pyndap la shah ruh ïa kino kino ki bym dei ki Garo kiba pnah ha ka ktien ka thylliej bad kiba tip ïa ki rukom im jong ki Garo ban pyndap ïa ka post na ka bynta ki Garo,” u la bynrap.
“Haba kumtei hato phi ïohi ba ka don shisha kata ka jingshah leh beiñ ki Garo kumba kam ka ACHIK ne dei ma ngi ne,” la buh jingkylli u Bah Louis.
U la ong ba na ka liang ka HNYM ka dawa ba ka sorkar ka dei ban shim ïa ka rai ha kaba ïadei bad ka snem ot kyrteng kat kum ka jingsngewthuh jong ka ba ka dei kaba byhatam.
“Hynrei lada ka sorkar ka shim ba u snem uba bha tam u dei beit naduh u 1972 ngi na ka liang ka seng ngim banse ban mih sha madan ban ïakhih katba dawa ka kam lada dei wat ban ïa umsnam ruh na bynta ban pynïoh ïa ka hok ki samla ka jaidbynriew,” u la ong.
Haba ïadei bad ka jingbyrngem ka ACHIK ban leit sha Suprme Court (SC) lada ym pyntreikam ïa ka Roster naduh u 1972 u Bah Louis u la ong ba kane ka jingleh ki paid Gao ka pyni ïa ka jingsngew khun khatduh ban leh katba ki mon ha ka jylla.
“Ka SC ka dei jong u paidbah bad lada ki kwah leit sha SC ngi ruh ngin lem lada ki kwah,” u la ong.
U la ong ba ka jingduna kaba la ïohi ha ka Reservation Policy, “Ka daw hi ka dei namar ngi la ïoh Myntri rangbah uba nyngkong eh kata u Capt WA Sangma da u Garo bad u la pynwandur khnang ïa ka Reservation Policy kumba ngi ïohi mynta ruh ka dei na ka bynta ka jingmyntoi ki para jaidbynriew garo jong u,’ ong u Bah Louis.
“Ki Garo lei ki dei ki jaidbynriew kba shu bamsuk beit lada phin peit ha ka jimngdawa jylla ruh u Garo u ïakhih tang ynda u la ïohi ba ka kam ka la jan seisoh katba ha ka jingshisha dei ki Khasi kiba la ïakhih tyngeh naduh kaba snang hynrei ynda la seisoh ka kam ïoh bamjem u Garo bad mynta ki kwah bam jem sa ïa ka Reservation Policy bad kane ka pyni ïa ka jingrhah bad ka jinglalot ban klun tang sha lade,” u la kynthoh.
Haba kren halo ka jingkynthoh jong ka ACHIK ïa ka VPP bad ïa u nongïalam jong ka halor ki nongrim kaba ka VPP ka la shim ha kaba ïadei bad ka Reservation Policy bad ka Roster System na ka liang ka HNYM ka la pynpaw ïa ka jingkyrshan kaba pura kaba ka ai sha ka VPP.
“Ngi ïoh ba ki kynnoh ïa u Bah Ardent bad ïa ka VPP ba ki kwah ban wanrah jingsnewpgher jaidbynriew hynrei nga kwah ban pynkynmaw ba kam dei kumba ki kynnoh hynrei ka dei ba ka VPP ka ïohi ïa ka jingnoh shiliang ka Reservation Policy bad na ka liang ka seng ka ai jingkyrshan pura ïa kane bad ym dei ban sngewthuh bakla ba ngi kyrshan ïa ka VPP na kino kino ki daw hynrei ka dei beit namar ka ienh ha ka nongrim ba ka jaidbynriew ka donkam bad lada kiwei ki party ki shim ïa kajuh ka sienjam ngin kyrshan pura ïa ki ruh,” u la ong.
“Kumba ka VPP ka dawa dorbar kyrpang ngi ruh ngi kyrshan ïa kane bad ka long kaba shongnia bad kaba dei hok ban ailad ïa ka jingïatai ïa ki MLA halor kane ka mat,” u la bynrap.