Ka Riti synshar ka India ka ai laitluid ban mane bad pynphriang ïa ka jingngeit niam: HYC

Shillong, Ïaïong, 14: Ka Hynñiewtrep Youth Council (HYC) ha ka sngi Palei ka la pynrem jur ïa ka jingshah pyndik ki arngut ki nongtrei balang jong ka Balang Presbyterian ba kynthup ïa u Rev RG Laloo bad u Tbn T Nongkhlaw ha ka leit jngoh ïa ka lyngkha trei jong ki ha Bihar ha ki shi kynhun ki briew kiba ym lah ban ithuh durkhmat ïa kaba la jia ha ka sngi Ba-ar.
Haba kren sha ki lad pathai khubor u President ka HYC u Bah Robertjune u la ong ba ka jingshah pyndik kine ki arngut ki nongtrei balang ka la long ka jingpynkheiñ ïa ka hok kaba ka Riti synshar ka ai ïa baroh ki nongshong shnong ka ri.
“Kat kum ka Article 25 jong ka riti Synshar ka ri la ai laitluid ïa baroh ki nonshong shnong ban ngeit ne mane blei, ban pynphriang ïa ki jingngeit niam jong ngi hynrei kane ka jingleh ki katto katne ha Bihar ka la pynkheiñ ïa ka hok jong ki arngut ki shakri u Blei,” ong u Bah Robert.
“Na kata ka daw ka sorkar jylla bad kumjuh ka sorkar pdeng ka dei ban leh da kaba tyngeh halor kito kiba knieh ïa ka hok ki arngut ki nongtrei balang ha ka jingleit jngoh jong ki ïa ka lyngkha trei jong ki ha Bihar,” u la bynrap.