Shillong, Iaiong 14: U Symbud Myntri Rangbah ka jylla u Bah Prestone Tynsong, ula ong ba ka jylla ka dang don hapdeng ka jingduna ha ka jingdon ki pulit bad ka dang donkam sa kumba 3500-4000 ngut ki pulit ha ki kyrdan bapher bapher.
U Bah Prestone Tynsong ula kren ïa kane mynta ka sngi, hadien ba la wai ka jingïalang bad ki heh pulit ka jylla kaba la tip kum ka SP/CO Conference kaba la long ha Police Headquarter, Shillong.
Haba ïakren bad ki lad pathai khubor hadien bala wai ka jingïalang, u Bah Prestone ula ong, ka jingïalang kala ïatai sani ïa ki jingeh bad ki jingdonkam jong ki pulit ha ka jylla bad kawei na ki jingeh ka dei ka jingduna ha ka jingdon jong ki pulit ha ka ban ai jingshakri ïa ki paidbah khamtam ha ka ban pynneh pynsah ïïa ka shongsuk shongshngaiñ.
“ Mynta ngi dang pynïaid shakhmat ïa ka jingpynrung kam ïa ki pulit ha ki kyrdan bapher bapher kiba don kumba 1000 tylli tam ki post ba lait. Ka Personal Interview ka dang ïaid shakhamat bad hapoh ka ar lane lai taiew yn sa thung ïa kine bad hadien kata yn sa khot interview rungkam biang namar ngi kwah ban pyndep ïa kane ka jingthung kam mynta hi u snem” ong u bah Prestone.
“Kawei na ki jingeh kaba ka tnad pulit ka mad ka dei namar ka jingduna ha ka jingdon jong ki pulit bad ka donkam haduh 3500 haduh 4000 ngut ki pulit. Ka jingïalang kala shim ia ka rai ban ïaleh ha ka ban pynsted ïa ka jingthep kam ha ka tnad pulit ha ki kyrdan ki bapher bapher khnang ba kin lah ban ai ka jingshakri bad ban pynneh ïa ka shongsuk shongsaiñ” ong u Bah Prestone.
Ula ong, ba ka jingïalang kala ïatai ruh halor kiba bun ki jingdonkam ban pynkhlaiñ ïa ka rukom treikam jong ki pulit naduh ka rukom pyntreikam ïaka Forensic Science Lab ïa kaba donkam ban buh shuh shuh ïa ki tiar ki tar bad ïa ki briew ki ban pynïaid bad khmih ïa katei ka Lab.
Nalor kane ula kdew ruh ïa ka jingdonkam ban shna ïa ki Police Outpost, Police Sattion, ki jaka sah jong ki heh pulit bad kiwei kiwei bad ki la ïatai sani ïa ka jingdonkam ban pynkhlaiñ ruh ïa ka tnad Cyber Cell, ka jingpynbiang ïa ki kali, ka jingpynbiang ïa ka jingdonkam jong ki pulit bad kiwei kiwei.
“Ngin ym lah ban shimkhia mardor ïa kine ki jingeh baroh shi syn leh hynrei kum u Myntri Kam Pohïing ngan ïaleh katba lah da kaba ïaid da ka wat ne ‘Phase’ ban pynbiang ïa kitei ki jingdonkam da kaba pynïoh kham bun ïaka bhah tyngka naka bynta ka tnad pulit” ong u Myntri Kam Pohïing.
Ha katei ka jingïalang kaba la pynïaid hi da u Bah Prestone Tynsong la ïadonlang u Director General of Police u Dr LR Bishnoi, ki heh pulit ka jylla naduh ki Superintendent of Police bad ki Commandant.
U Bah Prestone ula sam ruh ïa ki syrnod sha ki heh pulit na ki District bapher jong ka jylla halor ka jingtrei shitom ka jongki ban tehlakam ïa ka jingkhaïi be-aiñ ïa u drok ha ka jylla.
