Shillong, ïaïong, 14: U Director General of Police (DGP) u Dr LR Bishnoi ha ka sngi Thohdieng u la ong ka tnat Pulit ka la lah ban tehlakam ïa ka shongsuk shongsaiñ ha ka jylla’
“Ngi la lah ban tehlakam bad ngi la ioh ïa ka jingïatreilang kaba pura na ki paidbah,” ong u Dr. Bishnoi haba ïakren bad ki lad pathai khubor hadien ba la wai ka jingïalang ha Police Headquarters.
U la ong, ha ki district, bun na ki kam runar ruser kim dei kiba don bynta ban pynthud ïa ka shongsuk shongsaiñ.
‘Kaba kham sngewtynnat, ki kam lehnoh ki la hiar arsut bad kat ki kynhun kieng atiar kiba don, ki la don mynta ha ka lynti ka jingïakren ïasuk bad ki ksiang jong ka Sorkar Pdeng,” ong u Dr. Bishnoi bad bynrap, ‘kam da don than ka jingeh ïa mynta hynrei hadien habud kin sa lah ban mih ki jingeh bad na ka bynta kane ngi la pynkhlaiñ ban tehlakam ïa ka tnat kaba peit ïa ka shongsuk shongsaiñ khnang ba kin dup lah ban tem mardor.”
Haba kylli ha kaba ïadei bad ka jingbym hun jong ka Iingbishar Meghalaya High Court ïa ka jingtreikam jong ki Pulit ka jylla khamtam ha kaba ïadei bad ka jingkhaïi dewïong be-aiñ, u Dr.Bishnoi u la ong, “ngi la leh katkum ka jingbthah jong ka Iingbishar High Court bad ha kino kino ki jingduna kiba la kdew ngi la pyrshang ban pynbeit ïa ki jingbakla hynrei ka bor jong ki Puit kam pat kotbor ban peitngor manla ka jaka jong ka jylla bad kumba phi tip ki don ki surok khlaw kiba lah ban don ki jingkhaïi tuh ïa u dewïong. Ïa kane ka bynta ngi la pyrshang ban tehlakam da kaba phah ïaid pahara.”
“La kumno kumno ngi la lah ban tehlakam bad kano kano ka hukum kaba wan na ka Iingbishar lane na ka Sorkar sha ka tnat Pulit ngin sa pyrshang ban bud pyrkhing ïa ki,” u la bynrap.
