32 tylli ki jaka ha shilynter ka Wah Umkhrah bad Umshyrpi ban shna Sewage Treatment Plant

0

Shillong, ïaïong, 14: Lai phew ar tylli ki jaka kiba la ithuh ha shilynter jong ka Wah Umkhrah bad ka Wah Umshyrpi ban shna ïa ki Sewage Treatment Plant (STP) bad nalor kata la mana ruh ban shaiñ kuna lada lap ïa kino kino kiba pyntuid ïa ki jaboh jabaiñ ha ki wah.
La aipor haduh saw phew san sngi sha ki tnat badei peit ban leh eiei pyrshah ïa ka jingtih marpohkhyndew ha ki sawdong sawkun jong ka Wah Umkhen, kaba long ka tyllong sam umbam umdih ïa ka New Shillong Township.
Ïa kane ka pyntip da u Chief Secretary jong ka Sorkar Jylla u Bah Donald P. Wahlang hadien ba la wai ka jingïalang ban ïathir ïatai ha kaba bad ka jingpynim bad ban pynneh pynsah ïa ki lai tylli ki wah kiba kongsan ka nongbah Shillong ha kaba la sakhi lang da u Myntri Rangbah ka Jylla u Conrad Kongkal Sangma bad u Symbud Myntri Rangbah uba peit ïa ka tnat Pynroi Sor u Bah Sniawbhalang Dhar.
Ha kane ka jingïalang la ïashim bynta lang da ki kynhun bapher bapher ba kynthup ïa ki khlieh nongsynshar bad ki nongkitkam shnong bapher bapher, ha kaba la pynshai ruh ïa ki hukum kiba la pynmih da ka National Green Tribunal (NGT) ha kaba ïadei bad ka jingpynkhuid bad ka jingpynim biang ïa ki wah.
“Ka thong kaba hakhmat eh ka long ban don ka jingkitklieh lang na baroh bad ban ïatreilang da kawei ka thong bad kata ka long ban pynkhuid ïa ka Wah Umkhrah, ka Wah Umshyrpi bad ïa ka Wah Umkhen ki ban sa long hadien habud ki tyllong sam umbam umdih ïa ka New Shillong,” ong u Bah Wahlang ha ka jingïakren bad ki lad pathai khubor.
Haba kylli, kiei ki lad ki lynti ba la shim ban ïada na ka jingpyntuid ïa ka um jaboh bad ïa ki jaboh jabaiñ sha kine ki wah, u Bah Wahlang u la ong, ha ka jingai jingkren ha ka jingïalang, u la pyni ïa ki dur jong ka Wah Umkhrah ba la shon na ka Drone naduh kaba sdang jong ka tyllong um ter ter haduh ka shnong Mawlai bad kumjuh ruh ïa ka Wah Umshyrpi naduh ba sdang ka tyllong haduh ka jingkieng Umshyrpi bad ‘ha shilynter jong kine ki wah ngi la lap ïa ki sakhi sabut ba la pyntuid beit beit ïa ki jaboh jaboh sha kine ki wah.” U la ong, ha ka jingïalang kaba nyngkong halor kane ka kam kaba la long ha ka 6 tarik mynta u bani, la shim ïa ka rai ba la donkam ban ïasyllok bad kiwei kiwei ki kynhun bad ban pan lang ïa ka jingïatreilang khnang ban weng ïa kane ka jingeh.
“Naduh shitaiew mynshwa ngi la sdang ban shaiñ kuna. Ha ka jingshisha kino kino kiba pyntuid beit beit ïa ki jaboh jabaiñ sha ki wah bad kin kino kino kiba don ïa ki septic tank kiba la pei bad lada kim phah ban maramot hapoh 10 sngi ka jingshaiñ kuna kan long T.500 shi sngi ym tang shi sien hynrei ka jingshaiñ kuna kaba T.500 kan long manla ka sngi tad haduh ka sngi ba la maramot ïa ka septic tank lane lada ki la pynthikna ba ka jingpyntuid jaboh kan ym tuid sha ki wah,” la ïathuh u Bah Wahlang.
U la ïathuh ba ha ka jingïalang u la pyntip ruh sha ki Rangbah Shnong bad sha ki kynhun kiba peit ïa ka mariang halor ki kam kiba dang dei ban leh nangne shakhmat bad ban kyndit bynriew noh da kaba ïatreilang kum kawei ka kynhun.
Shuh shuh u Chief Secretary u la ïathuh ba ka hukum jong ka NGT ka la bthah ba ïa ka um jaboh ym dei ban pyntuid beit beit sha ki Wah.
“(Ha kaba ïadei bad kane), haduh 32 tylli ki jaka ba la ithuh, 20 tylli ha shilynter ka Wah Umkhrah bad 12 tylli ha shilynter ka Wah Umshyrpi, ïa kiba ngin hap ban shna ïa ka Sewage Treatment Plant bad san tylli ki dei kiba dang shna bad kiba sah ngi hap ban peit sa ïa ka jaka. Ha ki bynta ba hap ha ki jaka sorkar ngin sa buh ïa ki SPT bad lada ym don, ngin sa pan ïa ka jingïatreilang bad ki Dorbar Shnong ba kin ai jaka ban shna ïa ki STP katkum ba la bthah da ka NGT,” u la ong.
Katba ha kaba ïadei bad ka Wah Umkhen u Bah Wahlang u la ong, “ha Wah Umkhen ngi ïakynduh jingeh ha ka tyllong bad ngin sa leh eiei namarba ka jingtih marpohkhyndew ka dang ïaid ha kane ka jaka. Ngi ladep ai por haduh 45 sngi ban wad ïa ki lad ki lynti ban pynbeit ïa kine ki jingeh ha kaba ïadei bad ka wah Umkhen.”
“Ha kaba ïadei bad ka Wah Umkhrah bad Umshyrpi ka dei ka kam kaba jwat bad kaba shimpor haduh katta katta. Baroh ki dorbar shnong ki ladep sakhi ïa kaei kaba la jia bad ngi la aiti ruh ïa ki video ba ladep ring dur bad ngi la ai ruh ïa ki dur ba la pyntuid jaboh sha wah bad ïa ki jakhlia jakhlaid ba la theh beit beit sha ki wah,” u la ong.
Haba kylli hato ka don neem ka jingbuh por haduh lano yn pynkhuid ïa kine ki wah, u Chief Secretary u la ong, “kan shimpor, ngim shym la buh por hynrei ngin sa thaw ïa ka Core Group kumba la ai jingmut da u Myntri Rangbah ban buddien ïa kaei kaba ladep shim rai mynta ka sngi khnang ba kan ym kut noh tang ha ka jingïakren hynrei ka kam ruh ka dei ban ïaid shakhmat kumba ngi ladep ïakren.”
Halor ka kamram jong ka District Council, u Bah Wahlang, u la ong, “ha kaba ïadei bad ka jingpyntuid ïa ki jaboh jabaiñ, ha ka jingshisha mynta ka sngi, ngi la ïakren tang ïa kawei ka hukum ba kongsan tam jong ka District Council kaba pynkupbor ïa ki Rangbah Shnong ban shaiñ kuna ïa ki nongshong shnong kiba sah shabar ka Municipal bad da kane ka jingpynkupbor ïa ki Rangbah Shnong yn sa lah ban pyntreikam ïa ki kyndon aiñ bad nga kyrmen ba ki Rangbah Shnong kin pyndonkam ïa ka iktiar ba la pynkup ha ki katkum ka aiñ.”
U Chief Secretary u la pyntip ba T.110 klur ladep mang pisa ban ïada kumba la bthah da ka NGT ha kaba ïadei bad ka jingpynkhuid ïa ki Wah ha nongbah Shillong.
“Bun ki kam kiba la leh hapoh ki jaka kiba hap hapoh ka Municipal na ka bynta ka Shillong Municipal Board, ka pisa ka ban wan na ka AMRUT 2.0 bad kumjuh ruh na ka Swachh Bharat Management (SBM Urban) bad na ka 15th Finance Commission. Kam don kano kano ka pisa kaba la mang hynrei ïa ka pisa yn sa ioh namarba ka T.110 klur ka dei kaba la dep bhah da ka jingbthah jong ka NGT ha kaba ïadei bad ki kam pynkhuid ïa ki bynta bapher bapher jong ka nongbah Shillong,” u la bynrap.

Leave A Reply

Your email address will not be published.