Jraiñ twa ka khyndew ha Rngaiñ suba ba shah ban arngut

Shillong, Ïaïong 14: Ka surok kaba pynïasnoh ïa ki shnong kiba don ha ki sharing jong ka Riwar Mihngi ha ka sngi Thohdieng ki la dkut syndon thui da ka jingtwa jong u lum ba don ha Rngaiñ ha ka janmiet sngi Thohdieng ha kaba da ki spah tylli ki kali ki la sahkut ha katei ka jaka kiba thmu ban leit Pynursla ne leit Shillong.
Kat kum ka tyllong khubor kaba u Mawphor u la ïoh lum la ïathuh ba ha kane ka jingtwa khyndew ki don ar tylli ki kali ba julor kawei ka Mahindra Max ba julor malu mala bad kawei pat ka Datsun Go kaba don ïa u registration no ML 05 T 7892 kaba la suba ba dei ka kali u Rangbah Shnong jong ka Wahlyngkhat bad la suba ba don arngut kiba shong ha kane ka kali Dastun ki la shah ban ha kane ka jingtwa ka surok.
Kat haduh ba la thoh ïa kane ka khubor kaba ym pat shym la lapdien ïa kane ka kali ba la shah ban hynrei la lap tang ïa ka bumper ba sha khmat ryngkat bad u Number Plate bad na ka liang ki pulit ki la pyrshang ïa kaba bha tam ban weng ïa ka khyndew bad wad ïa kane ka kali kaba shah ban.
Haba pyrshang ban ïakren lyngba ka phone bad kiba sakhi ïa kane ka jingjia ki la ïathuh ba kim shu ïohi beit ba ka twa kynsan ka khyndew bad la ïohi ba ka twa ka la ban ïa kane ka kali Datsun katba ka kali Max ka la lait da ka said.
Shuh ha ka jingïakren bad kiba sahkut ha katei ka jaka ki la ïathuh ba kan shimpor na bynta ban weng ïa katei ka kyndew bad ki maw kiba la twa namar ka jingtwa ka la jur haduh katta katta.
Lah ban kdew hangne ba ha ka 4 tarik u Ïaïong ka Federation of Khasi, Jaiñtia and Garo People (FKJGP) Riwar Mihngi Circle ka la leit ban ujor ha u Sub Divisional Officer (SDO) jong ka Pynursla Civil Sub Divison pyrshah ïa ka kompeni ARSS Infrastructure Projects Limited kawei na ki kompeni ba pyntrei ïa ka surok Shillong-Dawki namar ka jingpyntrei torti jong ka.
Ha ka shithi sha u SDO (C) ka FKJGP ka la kdew ba ka jingpyntrei torti kane ka kompeni ïa ka jingpyntrei ïa kane ka surok ka buh jingma ïa ki nongshong shnong kiba don kham sha rum jog kane ka surok ba dang tih ban kham pynheh namar ka rukom tih bad ka rukom bret khyndew ka long kaba i don jingma ïa ka leit ka wan.
“Kane ka jingtrei torti kane ka kompeni lah ban sakhi tang da kaba shu peit ïa ki rukom trei jong ka bad jin lada ka don ka jingshimkhia kumba ngi dawa lehse kane ka jingjia kan ym da jia bad ngi kyrmen ba kan ym jia eiei ïa kito ki lanot ba shah ban kali,” ong u Information Secretary ka FKJGP Riwar Mihngi Circle u Bah Evanfield Khonglam haba kren bad u Mawphor.