Shillong, Ïaïong 14: Ka jingmih khubor ba ki arngut ki MLA jong ka Seng PDF, u Bah Banteidor Lyngdoh, MLA ka Mawkynrew bad u Bah Gavin Manuel Mylliem, MLA Sohra ki lah ban pynïasoh noh bad ka Seng NPP, kala pynduh thiah pynduh dem ïa kiwei pat ki artylli ki Seng Riewlum, kata ka UDP bad ka HSPDP.
Baroh arngut ki MLA ka PDF ki la don lypa ha ka sorkar MDA-2, hynrei kim shym la don pat ha ka Kynhun Myntri bad ka khubor ka ong ba kane ka rai jong ki ban pynïasoh noh sha ka NPP ka lah ban dei namar ba ki kwah ban don ha ka Kynhun Myntri. U Bah Banteidor ha ka MDA-1, udei u Myntri ka tnad Argiculture, Sports bad kiwei kiwei. Hynrei mynta ha ka MDA-2 u don shabar ka Kynhun Myntri.
Kane ka jingmih khubor ba ka jingrung ka PDF sha ka NPP bad ka jingkwah ban don ha ka kynhun Myntri lane ka jingtyrwa hi ka NPP ka dang dei tang ka jingantad jong ki lad pathai khubor, hynrei u President jong ka BJP, u Bah Ernest Mawrie, u la pynpaw ba hadien ka elekshon ha Sohïong ka lah ban don ka jingkylla shuki ha ka kynhun Myntri jong ka sorkar jylla.
Ki tyllong khubor ki antad ruh ba kane ka jingkylla kynsan ki PDF ban leit sha ka NPP ka lah ban dei namar ba ka NPP ka kwah ban ïoh bun ki MLA khnang ban ïoh hi marwei ïa ka majority khamtam ha kane ka por ba jur bha ka jingkyan na ka Reservation Policy bad ka Roster System.
Hynrei ki khubor ki ong ruh ba kan shem jingeh ïa ka NPP ba kan shu weng kumto ïano ïano na ka kynhun Myntri namar ba ka la ïatreilang hapoh ka sorkar. Ym tip la ka NPP kan weng na ki Myntri kiba dei napdeng ki Seng Riewlum, kata na ka UDP ne HSPDP ne kan weng napdeng ki ki Myntri kiba dei na ka NPP hi. Hynrei ki khubor ki ïathuh ba kiba bun hi ki MLA ka NPP kim kwah ba u Myntri Rangbah un weng ïano ïano na ka NPP, namar ba ka Seng ka la bun bha ki MLA bad ka dei hok ban ïoh bun ki Myntri ha ka Sorkar.
La ïathuh ruh ba katba kine ki jingantad ki dang ïaid katba nang mih ki sngi, ki Myntri kiba don ha ki Seng Riewlum ki la nang syier thot thot ïoh shah weng noh na ka shuki Myntri.
