Shillong, ïaïong, 14: Kumba la thung (appointed) Bishop ïa u Phadar Wilbert Marweiñ jong ka Nonbah Parish (Nongstoiñ) da u Pope Francis ha Rome ha ka 4 tarik u Rymphang 2023, ka jingpynkyntang Bishop ïa u kan long ha ka 16 tarik, Ïaiong, 2023 ha Cathedral Parish, Pyndengrei, naduh ka por 9.30 baje mynstep. Ïa ka jinglehniam pynkyntang Bishop yn sa pyndep da u Archbishop ka Jylla Niam Bah Shillong u Most Rev. Victor Lyngdoh.
Ha kane ka riti lehniam leh kyntang ki don bun ki jnit ki jnat pynsleh pynkhuid pynkyntang bad pynkupbor ha ka kyrteng U Blei U Kpa, U Blei U Khun bad U Blei U Mynsiem Bakhuid bad yn ieng sakhi kyrpang da u Nongmihkhmat jong u Pope ha India, u Archbishop Leopoldo Girelli, ki Archbishop, ki Bishop jong kane ka thaiñ North East India, ki Lyngdoh, ki kynhun riewniam bad ki paid jong U Blei. Ka jinglehniam kaba kum kane kan long kaba shongkun bha ka bym ju don khah khah laitnoh tad lada don jingpynkyntang Bishop biang hadien lehse ha ha Jowai Diocese, kaba shu sah khlem Bishop la kham slem.
Kum ban shu plie pyrda ïa kaba mynshuwa, ïa u Bishop Wilbert Marweiñ la kha ha ka shnong Rangblang Sohsyniang (kaba la pynmih bun ki Lyngdoh bad riewniam) ha ka 17 tarik, Rymphang 1970. U kpa u dei u Oswald Thyrniang bad ka Kmie ka Priska Marweiñ (baroh ar ki la leit noh sha la u Trai), u dei u khun bahynriew na ki phra ngut shipara. U hymmen nyngkong u dei u Terencius (RIP) bud sa u Clarencius (RIP) , u Primus, u Delphinus, u Desiderius, u Basil (RIP) bad ka para khatduh ka hep Stella Marweiñ . Ha iing kmie-kpa jong u Bishop don mynta sa ka para khatduh, u kynum jong u, u Maximum Sangriang bad ki 6 ngut ki khun rit jong ki (ki Pyrsa jong u Bishop). Ha Rangblang Sohsyniang u Bishop u dang don ki meinah bad ki kur bad bun bha ki kha ki man. Bun ruh ki kur jong u ki la mih na Rangblang bad ki la saphriang kylleng ki jaka.
U Bishop Wilbert u la leit skul step ha shnong ha St. Mary’s Secondary School ryngkat bad ka ap masi mynsngi kumba lai snem ei ei. Ynda u la pyndep ïa ka klas VII ha shnong u la leit skul kum u Aspiran ha St. Paul’s Minor seminary Lait Mer Upper Shillong ban pyndep ïa ki klas pule kiba dang sah ryngkat ki jingshah saiñdur shuwa ban long u riewniam Brodar. U la pule ïa ka philosophy ha Christ King College, Laitumkhrah bad ïa ka Theology ha Oriens Theological College, Mawlai.
La pynkyntang Phadar ïa u ha ka 27 tarik, ïaïong, 2003 ha Parish Rangblang da u Archbishop Dominic Jala.
U la shakri kum u Symbud Parish Priest ha Ummulong Parish lai snem. Hadien kata kum u nongpeit ïa ki jingdonkam ka iing (Procurator) jong ka Oriens Theological College, Mawlai jin lai snem. U la leit pule kham bniah shuh shuh ïa ka kam ban long u Nongsharai ha ka kam jong u Trai bad ïa ki paid jong U Blei (Missiology) ha Rome jin saw snem kynthih (2007-2010).
U la long u Assistant Parish Priest ha Parish Santa Maria Consenza, Italy, haduh san snem tam bad ha ka snem 2015 u la hap ban wanphai noh sha la ka Diocese lajong ban wan shimti kum u Parish Priest jong ka Nonbah Parish haduh ki sngi ba un da shah thung kum u Bishop jong ka Nongstoiñ Diocese. Shipor u la long u Vicar General jong kane ka Diocese Nongstoiñ ruh.
Ka Nongstoiñ Diocese ka kynthup ïa ka Geographical Area kaba heh kumba 3800 Sq.km kynthup ïa ka Eastern West Khasi Hills District, South West Khasi Hills District bad ka West Khasi Hills District ha kaba don kumba 5.85 lak ngut ki briew.
Tang ki riewngeit Katholik ki don kumba 2 lak ngut duna. Kine ki don ha ki 22 tylli ki Parish, kata, ha Mairang, ha Nongkhlaw, ha Kynshi, ha Nongkasen, ha Mawthong, Mawkyrwat, Munai, Nonghyllam, Mawpat, Rangblang, Nonbah, Mawkhlam, Maweit, Cathedral Pyndengrei, Rambrai, Umwahlang, Riangdo, Nongjri, Umdang, Shallang bad Riangdim.
Naduh u snem 1950, kham bun na kine ki Parish ki hap ha ka jingpynïaid na Marbisu ba la khlieh da u Mishoneri na ka dewlynnong Malta ïa uba la tip kyrteng kum u Phadar Carmelo Attard, SDB.
Broh kitei ki jaka, bun na ki kim pat don Katholik, ki hab ha ka jingkhmih na Lumtyngkong Parish Laitumkhrah hapoh ka jingkhmih ki Mishoneri German na ka sengniam Salvatorian bud sa ki Mishoneri na ka sengniam Salesian na Italy.
Uwei na kine ki Mishoneri uba tur tyngeh ïa ka raimaw raidieng jong ka Ri Khasi, khamtam ha West Khasi Hills u dei u Fr. Constantine Vendrame, SDB ïa uba la khot u Apostol jong ki Khasi-Jaiñtia.
Ïa ka Nongstoiñ Diocese la seng ha ka 28 tarik, Kyllalyngkot, 2006 bad u Bishop uba nyngkong u la long u Victor Lyngdoh, uba long mynta u Archbishop jong ka Shillong Archdiocese.
Mynta ka Balang ka dang ap khmih lynti dikdik na ka Holy See na Rome ban thung noh sa ka u Bishop jong ka Ri Jaintia-Ri Pnar.
