Shillong, Iaiong 14 : Ka Sorkar Jylla mynta ka Sngi Thohdieng, ka la pynlong ïa ka jingïatai ba sani bad ki Heh Ophisar lem bad ki Khlieh Nongsynshar halor ka jingpynkhuid bad pynim pat ïa ki Wah ba kongsan jong ka Nongbah Shillong ba kynthup ïa ka Wah Umkhrah, Wah Umshypi bad Wah Umkhen.
ïa kane ka jingïalang la pynlong ha Yojana Bhavan bad la ïa shim bynta da u Myntri Rangbah ka Jylla Conrad K Sangma, u Symbud Myntri Rangbah Ma Sniawbhalang Dhar, Myntri Bah AL Hek, Chief Secretary Bah DP Wahlang, ki Heh Ophisar bad ki Nongkitkam Shnong nalor ki Nongmihkhmat ba ki seng bapher bapher.
Ha ka jingïalang, u Myntri Rangbah Conrad K Sangma ula ong ba ka thong jong ka jingïalang ka long ban ithuh ïa ki jingdonkam bad wanrah ïa ka jingpynkhreh ban trei ha ki sngi ban wan na ka bynta ban pynkhuid bad pynim pat ïa ki lai tylli ki wah ba kongsan ka Shillong. Ula khot ïa ka jingïatreilang bad ki jingai jingmut jong ki Dorbar Shnong khnang ba kane ka jingthmu kan long kaba seisoh.
U Myntri Rangbah ula ong ruh ba ka long kaba donkam ban don ka jingpynbiang tarajur hapdeng ka mei mariang bad ka ïoh ka kot haba bynrap “Ka jingïalang ba ngi pynlong mynta ka dei shibynta na ki mat treikam jong ka Sorkar ban pynbiang tarajur ïa ka kamai kajih, ka ïoh ka kot bad ka mei mariang khnang ba yn lah ban ïada ïa ka mariang na ka bynta ka lawei haba trei ruh ïa ki kam ban kamai kajih.
U Conrad ula pynpaw ruh ba ka Sorkar ka la kut jingmut ban pynkhuid bad pynim pat ïa baroh ki wah kiba don hapoh ka Jylla.
Ula kren ruh halor ki katto katne ki prokam jong ka Sorkar ban tehlakam ïa ka jingkylla ka mariang ba kynthup ïa ka sewage and waste management, ban pynsangeh ïa ka jingpyndonkam plastic, ban pyndonkam ïa ki kali eletrik khnang ban pynduna ïa ka jingpynjaboh ïa ka lyer ba ring mynsiem, ban pynrben ïa ki khlaw lyngba ki jingïalap bad kiwei kiwei.
Ha ka jingbatai, u Chief Secretary Bah DP Wahlang ula pyntip ba ka Wah Umkhrah bad Wah Umshyrpi ki dei napdeng ki 45 tylli ki wah ba jaboh tam ha ka Ri kumba la lum thup da ka NGT. Ula khot ïa ka jingïashim bynta shitrhem jong ki Shnong ki Thaw bad ki kynhun bapher bapher kum ka KHADC, Dorbar Shnong, ki seng bapher bapher.
