Kyrpad ka BJP ïa ki paidbah ka Sohïong ban pynjop ïa u kyrtong ka Party

0

Shillong, Ïaïong, 14: Ka Bharatiya Janata Party Meghalaya State Unit ha ka sngi Palei ka la kyrpad ïa ki paidbah nongthep vote jong ka Sohiong Constituency ban pynjop ïa u kyrtong ba la ieng da ka party khnang ban pynthikna ba ki song pynroi kin tuid ha kane ka Constituency.
“Ngi kyrpad ïa ki paidbah jong ka Sohïong lada phi ai vote ïa ka BJP kin don bun ki jingmyntoi na ka bynta ki paidbah jong ka Sohiong ha kaba ïadei bad ki song pynroi,” ong u State President ka BJP u Bah Ernest Mawrie ha ka jingïakren bad ki lad pathai khubor.
U la pynpaw ïa ka jingkyrmen ba u kyrtong uba la pynieng da ka party u Bah Seraph Eric Kharbuli un ïoh ïa ka jingjop na Sohïong ha kane ka kynti.
U Bah Mawrie shuh shuh u la ong ba ka UDP kan kham khlaiñ ha ka elekshon ka ban sa long ha Sohiong ha ka 10 tarik, Jymmang na ka daw ka vote sngewlem kan long kaba bakla namarba u Bah HDR Lyngdoh um dei satia u Sitting MLA ha ka por ba u la khladnoh.
“Haba u (Bah HDR Lyngdoh) la khladnoh u dang dei tang u kyrtong. Ha,oid, ngi burom ïa u namarba u la long MLA la slem bha jong ka Sohiong bad ki paidbah ka Sohiong ruh ki tip bha ïa u synñiang u bynhei ba u la noh hynrei na ka liang jong ka party ngim don eiei ban kren pyrshah ïa kata bad ngam tharai ba ka vote sngewsynei kan treikam namarba um dei u Sitting MLA. Haba u pynkhreh ïa ka elekshon, u dei tang u kyrtong bad kum u MLA barim ka la ïapher shikatdei eh,” ula bynrap.
Ka UDP ka la pynieng bujli da u pyrsa jong u Bah HDR Lyngdoh u Bah Synsharlang Kupar Lyngdoh kum u kyrtong ha kane ka kynti.
Ha kajuh ka por, u Bah Mawrie u la ïathuh ba ka party kan ïakhun beit ha ki elekshon la ka long ha ka elekshon Lok Sabha lane ha kino kino ki elekshon.
“Ngin sa shong ïa ka jingïalang bad ki nongïalam ka party ha Delhi bad ngin sa shim ïa ka rai (halor ka elekshon jong ki Autonomous District Council bad ka Lok Sabha),” u la ong.

Leave A Reply

Your email address will not be published.