Shillong, Ïaïong 14: Ka Seng VPP kum ka jingïaleh ban nang pynkhlaiñ ïa ka Party, kan leit ban pynlong jingïalang ban pynrung kyrteng ha ki Konstituensi bapher bapher jong ka Ri Khasi Jaiñtia. Ha shuwa ban pynrung dkhot kan don ka jingpynshai ïa ki nongrim jong ka Party.
Katkum ka kyrwoh ba la pyllait da u Dr. Batskhem Myrboh, Nongaiktien jong ka Seng, la ong ba kane ka jingpynrung dkhot kan sdang ha ka 21 tarik mynta u bnai ha Amlarem, nangta 24 tarik ha Jongksha, 25 tarik ha Mawngap, 28 tarik ha Mawkyrwat, 1 tarik u bnai Jymmang ha Ummulong, 3 tarik ha Namdong, 5 tarik ha Saitsohpen, 6 tarik ha Umroi, 8 tarik ha Mawsynram, 13 tarik ha Shangpung, 15 tarik ha Kynshi, 20 tarik ha Nongpoh, 29 tarik ha Patharkhmah bad 6 tarik u bnai Jylliew ha Mawhati. Baroh ki jingïalang kin sdang ha ka por 10 baje mynstep.
Na ka liang jong ka Seng ka khot ka wer ïa ki nongkyrshan jong ka Party bad kumjuh ruh ki paidbah kiba don ka jingthrang ban pynkhlaiñ ban trei na ka bynta ka Party ba kin ïapoi sha kane ki jingïalang katkum kitei ki jaka ba la kdew.
