Ki kam lehkai kim ktah ïa ka jingpule lada nang bate ïa ka por: Phidawan Sanilee Wahlang
La ïoh khur 12 tylli ki takma ha ka N’tional bad 17 tylli ha State bad Inter School
Shillong, Kyllalyngkot 05 : Ka samla Phidawan Sanilee Wahlang ka samla kaba la khur bun tylli ki takma ha ka jingïalehkai Karate ha ki rynsan ïalehkai kiba la pynlong ha ki kylleng ki bynta ka jylla bad ka ri kaba la sdang ban lehkai ruh naduh ka rta kaba kam pat dap 10 snem ka rta ha ka jingïakren bad u Mawphor ka la ong ba ka jingpule kaba ka dang pule kam shah pynthut na ka kam lehkai namar ka don da ka por ba ka bate ïa ka por khrehkot bad ka por lehkai.
Haba kren ha ka sngi pynkupburom da ka Seng Samla Shnong Sohryngkham Pyllun (SSSSP) hadien ba ka la lah ban khur ïa ka takma ksiar ha ka rynsan lehkai Kanninjuku National Camp & Shoto Cup Karate Champion 2022 kaba la pynlong ha Gujarat, ka seng Samla ka la ai ka kitbok ehdaw ba kan nang lah ban khur shuh shuh shibun ki takma ha ki sngi kiban dang wan ha ka sngi Balang ka la ong ba kaei kaba ka la lah ban leh naduh ka rta kaba dang 9 snem ban khur takma ka dei namar ka jingkut jingmut bad ka jingïaishah ha ka por ba ka shah hikai pyntbit.
Haba kren ha kane ka sngi ki nongïalam ki seng bhalang bapher bapher ki la ai ka kyrkhu kyrdoh ïa kane ka samla ba kan nang trei minot ha ka kam lehkai khnang ban rah nam rah burom ym tang ïa ka shimet hynrei ïa ka shnong ka thaw bad ïa ka ri bad ka jaidbynriew hi baroh kawei.
Ha kane ka sngi u Samla Hamarbamut Kharduit u Tressurer ka seng, u la ong ba kane ka jingjop ka samla ïa kane ka jingïakhun ha Gujarat ka pyni ba ki samla ka shnong bad na ka jylla ki don bun ki sap kaba kin lah ban leh bha ha ki jingïalehkai lada ki ïohlad ban pyni ïa ka sap ne ki lad ha ka por ba dang biang ka rta ïa ka sap ba ki don.
Kane ka samla kaba dang 17 snem ka rta kaba pule ha ka klas kaba 11 Science ha Pine Mount School, ka la ïoh ban khur haduh kumba 12 tylli ki takma ha ka National Level kaba kynthup 8 tyli ki takma ksiar, 1 takma rupa, 3 tylli ki takma rnong. Shuh shuh nalor kine, ka la ïoh ruh 9 tylli ki takam ksiar, 6 tylli ki takma rupa bad 2 tylli ki takma rnong ha ka state level bad inter school level kaba ka la sdang ïakhun naduh ka rta kaba ka dang don 9 snem eiei.
Ha kane ka sngi ki seng bhalang kiba kynthup naduh ka KSU Sohryngkham Unit, FKJGP Sohryngkham Unit, TULBA Sohryngkham Unit, Sohryngkham Taxi Driver Association, Sohryngkham Sport and Cultural Club, u Sordar Shnong ryngkat ki riewrangbah bad ki paid nongshong shnong ki la wan ai khublei bad kitbok ehdaw ïa kane ka samla.