Shillong, Kyllalyngkot 05 : Ka Mawklot SC ka la sdang da ka nam jop ïa ka lympung ïalehkai phutbol ba la pynïaid da ka Hynñiewtrep Achik National Movement (HANM) Upper Shillong Mylliem Circle kaba la tip kum ka Inter Dong Knock-Out Football Tournament 2023 ha ka jingïalehkai ha madan shnong Mylliem 12 Mer.
Ka Mawklot ka la khur nam jop da kaba pynliem da 2-0 kol pyrshah ïa ka Lyngkien SC ha ka jingïalehkai kaba itynnad bha da ka jingwan sakhi lang ki paidbah jong katei ka dong ka thaiñ.
Ïa katei ka lympung la plie pyrda da u Bah Joanes Lamare kum u kongsan ha ka jingïadonlang u Bah Lamphrang Kharbani President ba rangbah jong ka seng HANM kum u symbud kongsan. La ïadonlang ruh ki nongkitkam jong ka HANM Upper Shillong Mylliem Circle naduh u President, Secretary bad kiwei kiwei.
Haba ai jingkren ha kane ka sngi na ka liang u Bah Joanes u la ai khublei ïa ka HANM Upper Shillong Myllie Circle kaba la pynlong ïa kaba kum kane ka jingïalehkai kaban long kawei ka lad ba ki khun samla kin ïoh ban pynpaw ïa la ka sap ba ki don bad khamtam eh ba kin lait na kiba bun ki jingsniew na ki jingdih pynbuaid, u drok ka kyiad bad kiwei kiwei.
U la kyntu ïa ki samla ba kin pyndonkam hok ïa ka sap namar ha kine ki sngi ba mynta ka jingïalehkai kam dei shuh tang ban ïalehkai sngewtynnad hynrei ka la dei ka lad ai kam ai jam. U la ong ruh ba hapoh ka jylla ka jingïarap na ka sorkar na ka bynta ki nongïalehkai ka dang duna shaba palat haba ïanujor bad kiwei ki jylla tang ha ka thaiñ shatei la mihngi ka ri India kum ka jylla Manipur.
U Bah Lamphrang Kharbani haba ai jingkren shwa kane, u la ong kum ka seng kaba ïakhun ïa kiba bun ki mat na ka bynta ka jaidbynriew ka peit ruh ïa ka bha ka miat jong ki samla da kaba pynlong ïa ki jingïalehkai bapher bapher khnang ba ki samla kin ym ngop ha ki jingdih kiba sniew.
U la kitbok kitrwiang ïa baroh ki kynhun kiba ïashim bynta ha katei ka lympung ba kin ïalehkai bha da ka mynsiem ïakhun khnang ba kin ïoh rah ïa ka thong jong ka jingjop.
Haba phai pat sha ka jingïalehkai hapdeng kitei ki ar tylli ki team, ka jingïalehkai ka kham lah shilliang ha kaba ki rangïalehkai ka Mawklot ki kham lah ban bat bad pynshat bol. Ka Mawklot ka la ïoh ban thep ïa ka shi kol ka jingïalehkai jong ka kylla step bad ïa ka shi kol ha ka kylla miet bad watla ka kynhun jong ka Lyngkien ki la ïakhun tyngeh hynrei haduh kaba kut ki khlem ïoh ban pynphai ha kaba ka Mawklot SC ka la pynliem syndon da 2-0 kol.
