Watla na ka liang ka National Peoples Party kumjuh na ka United Democratic Party ki la kam ba kin ïoh beit palat ïa ka 30ngut ki MLA ha ka elekshon kaban long ha u 2023 hynrei ym pat lah pat ban kheiñ troiñ ïa ka Congress wat hadien ba baroh ki MLA ki la krih noh sha kiwei pat ki party ha kine ki khyndiat sngi ba la dep. Kumba long mynta, jan man ki constituency khamtam eh ha rilum Khasi, palat mar shiteng ka jingïakhun ka dei hapdeng ka UDP bad NPP lait noh tang katto katne tylli ba ka jingïakhun ka long hapdeng ka UDP bad Congress ne NPP bad Congress. Don ruh ki jaka ba ka jingïakhun ka long hapdeng ki party riewlum bad kiwei pat ki party bym dei NPP ne UDP.
Kumba long haduh mynta hi, ka Congress ka dang don bun bha ki jaka kiba ka ktem ka dang khlaiñ la ka long naduh Mylliem, Pynthorumkhrah, Jirang, Mawryngkneng, Mawkynrew, Sohiong, Mawkyrwat, Nongstoiñ, Nongpoh, Umroi bad kiwei kiwei khlem pat kheiñ ïa ki constituency ha rilum Jaiñtia Hills bad kumjuh ha rilum Garo. Ki don ruh ki jaka kum ha Mawkynrew ba ka jingïakhun kam dei hapdeng ka NPP bad UDP hynrei kan dei hapdeng ka PDF ba mihkhmat da u MLA ba mynta ba dei ruh u Myntri ha ka sorkar jylla Bah Banteidor Lyngdoh pyrshah ïa u kyrtong ka UDP Bah Remington Pyngrope kumjuh ïa u kyrtong ka HSPDP Bah Martle N Mukhim.
Kane kan jia kumjuh ruh kum ha Nongkrem ba ka jingïakhun kan long hapdeng ki lai ngut, kata hapdeng u MLA ba mynta uba ka UDP ka kam ba un iakhun noh na katei ka party, pyrshah ïa u MLA ka Mawhati ba wan aireng noh na katei ka constituency Bah Dasakhiat Lamare bad ruh kumjuh u Bah Ardent Miller Basaïawmoit na ka Voice of the People’s Party.
Ka Mylliem ruh kan dei kawei na ki constituency kaba ka jingiakhun kan dei kaba itynnad bha namar hangtei ka jingiakhun kan dei beit hapdeng baroh lai tylli ki party heh, kata hapdeng u kyrtong ka NPP ba dei ruh u MLA ba dang shu resain na ka PDF Bah Hamlet Dohling, nangta u MDC ka Mylliem Bah Ronnie na ka Congress bad u MDC ka Laban uban iakhun na ka tiket UDP.
Lada ïa kren pat ïa ka Trinamool Congress, la ïohi ba katei ka party kaba khring haduh 12 ngut ki MLA ha kaba sdang mynta i kumba ka la nang duna duna ka jingbun paidbah hadien ba her ki khubor ba wat kiba la rung ruh ki thmu ban mih noh. Kine kiba la paw paidbah ba ki mih noh ki kynthup ïa ki arngut ki MLA na rilum Garo kiba thmu ban leit noh sha ka NPP katba ki arngut na rilum Khasi pat ki kynthup ïa u MLA ka Mawsynram Bah HM Shangpliang uba la mih ban leit iasoh sha ka BJP katba u Bah Shitlang Pale na Sutnga Saipung pat u pynkhreh ban leit ia khun na ka party riewlum.
Watla ka elekshon ka sah sa kumba ar bnai ei ei pynban ki jingkylla kin dang bun bha namar haduh mynta wat ki MLA kiba bun ki dang kulmar jingmut la kin ïai neh na kaparty ba ki don lane kin leit ïakhun noh na kiwei pat ki party. Kane hi ka pynlong ïa ki paidbah ruh ban sah ha ka jingkulmar jingmut wat ban ïalap ïa wer ïa ki nongkyrshan. Tangba lah pat ban ong ba kane ka elekshon kan dei kawei na ki elekshon kaba kham pher bha kaba ki paidbah kin ïoh ruh ban sakhi ne bishar ïa ki kyrtong da ka jingïarap jong ki social media. Tangba ha kajuh ka por ka juk jong ki social media ruh kan ktah jur pat ïa kiba bun ki kyrtong bad wat ban pynrem ruh ïa ki ha kane ka elekshon.
