Nongstoiñ, K’lyngkot, 5: Ha ka sngi palei 5 tarik Kyllayngkot 2023, ka ophis jong Deputy Commissioner West Khasi Hills, ka la pyllait ïa ka thup kyrteng jong ki nongthep vote (Final draft Electoral roll) jong kiba la kynjoh 18 snem haduh ka 1 tarik Kyllalyngkot 2022 na ka bynta ki lai tylli ki Constituency ka 32 Nongtoiñ, 33 Rambrai Jyrngam bad 34 Maw-shynrut Constituency. Kat haduh hynne ka sngi, ka Nongstoiñ ka don 42819 ki nongthep vote, ka Rambrai Jyrngam 39368 ki nongthep vote bad ka Mawshynrut ka don 49105 ngut ki nongthep vote.
Ïa ka jingpyllait ïa ka thup kyrteng jong ki nongthep vote ha kitei ki Constituency, la pynlong ha ka jingïalang kaba la long ha Conference hall jong ka ophis u Deputy Commis-sioner, ha kaba la ïa don lang da u bah Garod LSN Dykes Deputy Commissioner u ba dei ruh u Electoral Officer jong ka District, ki EROs AEROs bad ki Election agent jong ki seng saiñ pyrthei ba kynthup ïa ka Hill State People Democratic Party, United Democratic Party, Bharatya Janata Party, Indian National Congress, National Peoples Party, All India Trinamool Congress bad kiwei kiwei ki party.
La pynïaid ïa ka jingïalang da u Deputy Commissioner bad la ïoh ïa ka jingkren lamphrang bad ka jingpynshai da u bah M.Diengdoh MCS Addi-tional Deputy Commis-sioner u ba dei ruh u ERO, ha kaba u la pynshai ruh ba ka jingpynrung thymmai ïa ki kyrteng jong ki nongthep vote ha baroh lai tylli ki Con-stituency, ka dei ïa kito kiba la kynjoh khatphra snem kat haduh ka 1 tarik Kyllalyngkot jong u snem ban wan.
U la ong ba ka jingpyllait ïa katei ka thup kyrteng kam pat dei satia ka final, hynrei ka dang dei tang ka draft bad ki dang lah ban don ki kyrteng kiba hap ban pynbeit ïa ki jing bakla ha ka jingspel dak, kiba dei ban weng noh na ka electoral roll na ka daw ba ki la khlad noh bad kiba la pynkynriah ïa ki kyrteng jong ki na kawei ka polling station sha kawei pat.
La aiti ïa ki thup kyrteng sha ki Election agent bad la ïoh ruh ïa ka jingkren lyngkot na u bah Garod LSN Dykes Deputy Commissioner, ha kaba u la pynshai ba ka jingpyllait ïa ki thup kyrteng ka long katkum ba la btah da ka Election Commission of India, hadien ba ki BLOs ki la pyndep ïa ka jingleit lum ïa ki kyrteng na man la ki shnong bad ki la pynpoi sha ka District Election Branch jong ka district ban pynbit pynbiang bad ban pynrung ïa ki ha ka thup kyrteng jong ki electoral roll.
Ha kajuh ka por u la pynshai ba shuwa ba ka General Election kan long, ka District Election branch ka donkam ïa ka jingïatreilang bad ki nongsynshar shnong, ki paitbah bad na baroh ki liang, khnang ban pynneh ïa ka burom jong ka West Khasi Hills District, kaba la long kawei na ki District kiba ka election ka ïaid beit ïaid ryntih bad ka bym ju don kano kano ka jingdkoh ha ka por thep vote.
