Ki jingshisha ha kano kano ka Jaidbynriew ki paw shai ha ka por Election: Dr. Fabian Lyngdoh

Nongpoh, Kyllalyngkot 13: “Ki jingshisha ha kano kano ka jaid bynriew ki paw shai ha ka por Election” ong u Dr. Fabian Lyngdoh kum uwei na u nongshong shnong ba pura ka Meghalaya sha ba ka jylla Meghalaya kan kynjoh sha kawei pat ka samoi ban pynthymmai ïa ki nongmihkhmat hapoh ka jylla ka ban sa long ha u bnai Rymphang 2023.
Kum ban pynpaw paidbah, u Dr. Fabian Lyngdoh, u dei u Nongshong shnong ka Shnong Mawbri ha Ri Bhoi District bad uba la pyndep ruh ïa ka Kyrdan Ph.D ha ka subject Sociology bad u la dei ruh u Chairman bad MDC barim ka KHADC bad u Prophesor ka Martin Christian Luther University.
Haba ïa kren bad u Mawphor, u Dr. Fabian Lyngdoh, u la ong ba kane ka jinkren ka long ka jingkren kyllum na ka bynta ka Jaid bynriew ha kaba mynta ka don hapdeng ka jingpynkhreh ïa ka election ban jied ïa ki nongmihkhmat paidbah ki ban ïa said na ka bynta ka jaid bynriew bad lada ki paidbah ki biej ban jied ka jingduhnong ka long ïa ka jaid bynriew hi baroh kawei.
U la ong ruh kum u nongshong shnong ka jylla Meghalaya ba u kwah ba ki nongïalam bad ki riew shemphang ka jylla ki dei ban mih ha kane ka por ban kren sha ki paidbah ba ha shuwa ba kin jied ïa ki nongmihkhmat ki dei ban khan da kñia ne ban pyrkhat sani namar ka jingjied ïa ki nongmihkhmat ka dei ka kam kaba kyntang kaba lah ban tei ïa ka jaid bynriew bad pynjot ruh ïa ka jaid bynriew.
U la kren kyllum ruh ba ki jingshisha ki paw ba katba ym pat don ka election la iohi naduh ki paidbah, ki seng bhalang bad kita kiba kam ba ki dei ki nongïalam jaid bynriew ka ri ki ïalang ha Monphran kum ki Khlawait jong ka jaid bynriew da kaba ki pynkhihwin pyrshah party ne pyrshah sorkar bad baroh ki paidbah ki ïa ñiom shata bad kaba sngewlyngoh pat ha kum kane ka por ym shem la don kino kino kiba kren na ka bynta ki mat ki jura ka jaid bynriew.
“Haba don ka jingïalang paidbah ryngkat kita ki nongïalam ka kren pyrshah sorkar bad la sngew kumba ki leit ban pynkhihwin ne leh ei ei noh ïa ka Secretariat bad Assembly Building ne ban kren pyrshah ïa kita ki myntri sorkar na kabynta ka ri bad ka jaid bynriew, hynrei haba poi pat kum kane ka samoi ba kyntang ba ki paidbah ki hap ban pynthymmai ïa ki nongmihkhmat kita ki nongïalam bad ki paidbah ki sngap jar jar khlem da kren ïa kit ki mat ki jura jong ka jaid bynriew” ong u Dr. Fabian Lyngdoh.
Shuh shuh, u la bynrap ruh da kaba ong ba ki paidbah ha kane ka kynti ki dei ban long kiba sian bad kiba iohi jngai ha kaba kim dei ban shah ïalam bakla ha kita kiba khot ïa lade kum kita ki nongïalam ne ki kynhun bad ha kajuh ka por ruh kim dei ban biej ïa ka bor jong ka pisa ne ka jingshah pynbiej da kino kino ki kam ba ai jingmyntoi tang ha ka por election bad lada ki kwah ba wan ka jingkylla bad ka jingmyntoi ïa ki jaid bynriew shuwa ba kin shim ïa ka rai ban jied ïa kita ki nongmihkhmat ki dei ban da tih bniah bad pyrkhat sani khnang ba ngin ioh ïa kita ki nongmihkhmat kiba don shisha ka jingkitkhlieh na ka bynta ka ri bad ka jaid bynriew bad ym kita ki nongmihkhmat kiba pyrkhat ïa ka malade, u la bynrap.