Sdang ka UDP Jowai Circle ïa ka jingïalap paidbah ha Iawmusiang ban pynsngew ïa ki nongrim treikam

Jowai, K’Lyngkot 13: Ka United Democratic Party (UDP) Jowai Circle kawei na ki seng riewlum ba paw bha mynta hapoh ka jylla, mynta ka sngi kala sdang ban mih shakhmat ban ïalap paidbah bad ban pynsngew ïa ki nongrim treikam ba skem ban shakhri ïa ka paidbah ka jylla hi baroh kawei.
Ha kane ka sngi la pynlong ïa ka jingïalang ba Building jong ka Iew Seiñ Raij ha Iawmusiang Jowai, ïa ka jingïalang la pynïaid da u ma Kitboklang Nongtdu President Jowai Circle, ha ka jingdonlang u kyrtong ka 2-Jowai Constituency ma Moonlight Pariat, ma J. Treilang Suchiang MDC, ma Dawan Lyngdoh MDC, ma Marki Mulieh, kong Robila Mylliempdah, ma Baitlang Pohsngap nalor kiwei de.
U Moonlight Pariat kum u kyrtong ka UDP haba ai jingkren ula ong ba ka seng United Democratic Party (UDP) ka long kaba la pynkhreh bha mynta ka kynti ban ïakhun ïa kane ka Election MLA 2023 da ka jingkyrmen ban wan ha ka bor shynshar, ha kaba ula kyntu ïa ki paidbah ba kin ai ka jingkyrshan ba pura ïa kane ka seng Riewlum.
Ula pynsngew ruh ïa ka jingleh donbor jong ka sorkar MDA hapoh ka jingïalam ka NPP bad kam don shuh kata ka jingshngaiñ ïa kiba bun ba lang bad ha ka juh ka por kila ïalam bakla ïa ki nongshong shnong ka jylla naduh ka jingkyrduh, jingdap ram bad ka jingbym biang shuh ha ka khaïi ka pateng bad kiwei de.
“Ngim wan ban pynbeit ïa phi hynrei ngi wan da ka jingshisha ban pan na phi ïa ka Vote ba kordor namar dei tang kane ka Party trai ri kaba lah ban shynshar dalade ïalade ym kum kiwei pat ki party kiba long nabar” ong u ma Pariat.
Ka Rilum Jaiñtia ka don ïa ka spah bah ha ka mariang naduh ki marpoh khyndew bad kiwei de ong u ma Pariat, hynrei mynta la pyndonkam bakla ïa ki da ki riew shimet kiba don ha ka bor, lada ki paidbah ki ai ka jingkyrshah ïa ka UDP ka seng kan ïakhun kumno ban ïada ïa kine ki jingmih (khajna) kiba ïoh na ka mariang khnang ban im pateng bad ka lawei.
Ula ong naduh ka snem 2014 ka NGT kala khang ïa ka jingtih dewiong bad ka sosar jylla kala ïaleh mukot duma ban die noh ïa u dewïong ba dang sah haduh 32 MT hynrei dei tang kita ki High Level ki ïoh lad ban pynïaid katba mon ïa jingkhaïi dewïong tuh.
Shuh shuh ula pynsngew ka jingleh jong ka sorkar ba mynta kala wanrah ïa ki jingeh kiba ha rukom haduh bala pynlong ïa nonghikai ban leit thiah sha surok, ka jingrah Pla Card, ki jingïakhih ba bun jait bad kane kam long ka lynti kaba bha.
Kumba ka long mynta ula ong ba ka plan jong ka sorkar kala thmu ban pynduh wat ïa ka District Council kaba dei ka nongïada ïa ka riti ka dustur, ka khyndew ka shyiap, hynrei lada duh ïa kine kam don jingmyntoi shuh ïa ka jinglong trai, kumta u ong lada pynjop biang ïa kane ka NPP la tikna ba ka District Council kan duh ka dam noh.
Ula ong lada u wan ha ka jingjop ha kane ka kynti u thrang ban wanrah ïa ki kam pynroi ha ka liang ka koit ka khiah, ka pule puthi bad kiwei, shuh shuh u kyrmen ba ka UDP kan trei da ki kam ym kumba leh ka NPP kaba la plie tang ki mawnongrim khlem da pyntreikam, da kaba u ai nuksa ïa ka MCH ka jaka sumar ïa ki longkmie bad ki khynnah kaba don ha Panaliar, kaba la dep plie katba katei ka Hospital ka dang khang tala bad kane ka dei ka kam pynïam briew.
Ula kular ruh ban pyndep ïa ka Iawmusiang kaba la eh sah khlem da don shuh kiba ïohi wad hadien ba ka sorkar kala dep ban pyllait ïa ka pisa Instalment kaba nyngkong bad kaba sah sa 2 tylli ki Instalment hynrei kiba bun kim shem lynti ban wat ïa ki.
Kum ka Iawmusiang kaba dei ka ïit khmih jong ka Jowai ula pynsngew ba ka UDP kan pyrshah ban wad ïa ki lad ki lynti lyngba ki State skim ban pyndep noh ïa ka Iawmusiang, ula kynthoh ruh ïa ki ñuit kiba dang neh sah haduh mynta kine baroh ki dei da ka jingbym ïa sngewthuh jingmut lang.
“Ka jingduh kam jong ki khun samla kala jur bha mynta ong u ma Pariat halor kane ka Party ka don ka plan ban wad ki lad ki lynti na ka bynta ki khun samla kiba la pyndep ïa ka pule puthi bad kiba don ka jingkyrmen ïoh ïa ka kam ka jam”.
Mynta ka don ka jingma kaba khraw eh ïa ka sor Jowai ong u ma Moonlight namar ka jingleh jong ki nongïalam ba mynta kiba la pynkynriat lut ïa ki ophis sorkar bapher bapher, ula ong lada ki paidbah ki dang ïohthiah ym slem shuh sa ki ïing ki sem jong ki briew ruh kin sa rah. Ula kren shai lada pynkynriah sa ka DC ophis bad ka Treasury la tika baroh ki Bank kin mih bad leit buh ophis sha jan jong kitei ki ophis ha kano kano ka jaka ba ki don.