Sam work order u bah Kyrmen Shylla ha shnong Bataw bad pdiang burom ki nongkyrshan ïa u MLA

Khliehriat kyllalyngkot 13: U myntri ka sorkar jylla, uba dei ruh u MLA jong ka 6-Khliehriat Constituency, u bah Kyrmen Shylla, myn ha ka 11 tarik mynta u bnai, u la hiar sha shnong Bataw bad u la sam haduh hynriew tylli ki Work Order, sha ki hynriew tylli ki kynhun ba kynthup ki Seng niam, ka Sport Clud, ki skul bad kiwei kiwei ki kynhun, na ka liang ki nongkyrshan jong u, ki la pdiang burom ïa u bah Kyrmen Shylla sha ka jingïalang ba la pynlong ha ïing Dorbar Hall Bataw dong Umlatap.
Katkum u kyrwoh, la ong ba ki nongkyrshan kila pynpaw ka jingsngew nguh kaba khraw ïa u nongmihkhmat ka thaiñ, u bah Kyrmen Shylla namar ba watla hapdeng ka jingwan pynwit ka khlam covid-19 ruh, hynrei u dang lah ban pyndep shisha ïa kaba u la kular bad ki la sakhi ïa ki kam ba bha jong u kum u nongmihkhmat ba u la ïarap ban pynioh ruh ban siang rong ïa ka surok hapoh shnong Bataw kaba ha ka mang tyngka kaba T1.68 klur tyngka, u la lah ban pynioh ïa ka ïing skul kaba ha ka mang tyngka kaba T 37 lak tyngka, ka jaka peitkai (View Point) kaba la pynlut haduh T 10 lak tyngka bad kawei kaba ki nongkyrshan ki sngewnguh eh ïa u bah Kyrmen Shylla, ka long ba dei lyngba ka jingïarap jong u ba ha u snem 2020 la ïoh ruh ïa ka PHC kaba pura ha shnong Bataw bad kane ka long ka jingmyntoi kaba khraw ïa ki paidbah nongshong shnong , kumjuh ruh u la lah ban ai kiwei kiwei ki work order ruh ha ki por ba la leit.
Ki paidbah ba kyrshan ïa u MLA, ki la ai ka jingiaroh ïa ka jinglong ba bha jong u bah Kyrmen Shylla, uba kloi ban ïarap ïa baroh naduh ki ba heh haduh kiba rit, kumta da ka mynsiem ka jingsngew ieid ki la ai ka jingitbok kitrwiang ïa u ba ha kane ka election ka ban wan ruh un dup ioh biang ïa ka jingjop don burom
Haba kren ha ka jingialang ha Bataw, u bah Kyrmen Shylla ruh u pynpaw ka jingsngew kmen kaba khraw haba u ïohi ba ki nongshong shnong jong ka shnong Bataw khamtam ki nongkyrshan jong u ba ki long ki briew kiba shisha bad u ngeit ruh ba ha kane ka election ka ban wan ruh ki dang bun ki nongkyrshan na shnong Bataw ki ban dang jied ïa u, u la ong ruh ba kum u briew hi um lah ban pyndep lut ïa baroh ki kam kiba dang sahteng, hynrei u kular ba lada u poi biang sha ka thong ka jingjop un ialeh ban pyndep ïa ki kam ba dang sah, kata da ka jingiatreilang bad ki Waheh Shnong bad kumjuh ruh bad ki paidbah.
Kiba la ai jingkren ki kynthup ruh u Assistant Waheh Shnong Bataw, u bah Skhem Sumer bad la ïa don ryngkat lang ruh u Chairman Shnong Bataw lem bad ki riew rangbah ba kynthup u bah Martin Lyngdoh, u Mathew Pajat, u Shewani Sumer, u Klemen Pajat, u Tony Byrloi, u Waheh Shnong ba rim, u bah Bhalang Suchiang bad kiwei kiwei
Kane ka long katkum u kyrwoh ba la phah da u President Rum Shnong Youth Club Bataw, u bah Deihok Sumer.