Ba shah thad kyrteng bad shah kynnoh tuh masi, mudui ehjahar ar ngut ki rangbah

Mawkyrwat, K’lyngkot, 13: Ki ar ngut ki rangbah da ka mynsiem jong ka jingsngewsih, sngewkhia bad sngewjah burom hadien ka jingshah thad khlem nongrim ïa ka kyrteng jong ki, ki la sngew dei ban leit ujor da ka ehjahar hapoh Mawkyrwat Police Station, South West Khasi Hills District pyrshah ïa ki ‘riew shim kabu ki bym don shuh ka jingïatip lem.
Lah ban kdew ba ki ar ngut kiba la shah thad ïa ki kyrteng ba la kynnoh ba ki dei kiba im kamai spah da kaba tuh masi ki long u bah Dossli Thongni bad u bah Johnny Thyrniang kiba na ka shnong Wahkaji, South West Khasi Hills District bad mynta ka sngi kine ki rangbah kila leit ban ujor syndon da ehjahar pyrshah ïa ki riew shim kabu ban pynthoh bria ïa ka kyrteng jong ki.
Katkum ka ehjahar ba ki la leit ujor ki la pynpaw ba ha ka 10-01-2023 ki la ïoh jingtip ba ka la don kawei ka jingthoh ba la pynsaphriang paidbah ha ki social media da kaba kdew ïa ki kyrteng jong u bah Dossli Thongni bad u bah Johnny Thyrniang kum ki nongleh-beaiñ bad ki nongleh ïa ki kam sniew ba long pyrshah ïa ka imlang sahlang bad ïa ka hok longbriew manbriew.
La ong ruh ba ha kata ka jingthoh la kdew ïa ki bad la soi ha ka kyrteng jong ki da kaba pynkam kum ki nongtuh masi, nongtuh blang bad kita ki nongshohnoh briew kiba long ki jingkynnoh ba khlem nongrim ha kaba ma ki kum ki trai kim don jingtip namar kim shym la leh ne don jingthmu ban leh ïa kino kino ki kam ba long beaiñ bad pyrshah ïa ka imlang sahlang. Ha kata ka jingthoh la kdew khlem nongrim ïa ki ba kin ïai bteng ïa ki kam pyntriem ïa kita ki kam sniew bad wat ban leh ïa ki kam kñia briew (human sacrifice), kiba ma ki shimet ki sngewpyrshah jur ïa kiba kum kita ki kam lada jia ha ka imlang sahlang ne ha shnongha thaw.
La pynpaw ruh kita kiba soi harum ki kwah ban ïathuh ba kato ka jingthoh kam dei kaba mih na ki bad la shu leh da mano re mano ba shim kabu namar la pynkam khlem nongrim ha kata ka jingthoh da kaba soi ïa ki kyrteng jong u bah Dossli Thongni bad u bah Johnny Thyrniang kumkita ki nongleh bymman ne ki nongleh beaiñ.
Kumta ha kaba ia dei bad kijingpynshai, ki jingpyntip bad ki jingujor ba la kdew, u bah Dossli Thongni bad u bah Johnny Thyrniang ki kyrpad ïa ka police department ba kin register case bad ban wad ruh ïa ki briew kiba donkti ban thoh bad pynsaphriang ïa kajingthoh ba pynjah burom bad ba la shu thoh bad soi khlem nongrim ha ka kyrteng jong ki, namar kane ka jingthoh ka la pynjah burom hakhmat kiba bun balang katkiba ïoh pule ïa kata ka jingthoh bad ruh kaba la pyntieng pynsyier ruh ïa ki.