Nongstoiñ, K’lyngkot, 13: Kumba ju long man la u snem, ha une u bnai Kyllalyngkot ki nongkhaïi synsar ki la sdang ban tur haman la ki jaka bad ki shnong ki thaw, ban leit ïakynduh ïa ki nongrep ban dup ïakut lypa, ba kin thied la ha ka dor ka ba biang lada ka ïew ka hat ka ïaid bha.
Ha kine ki sngi la ïoh ban ïakynduh ïa kiba bun ki nongrep synsar kiba la sdang ban kheit na ka bynta ban pynryngkhiang bad pynïaid ïew. La ïoh ban ïakynduh ruh ïa ki nongthied kiba la sdang ban thied ïa u synsar u bym pat rkhiang ruh. Ki nongthied ki la ong ba ka dor jong u synsar u bym pat rkhiang ka poi ka long sawphew tyngka shi kilo, hynrei ïa u ba la ryngkhiang bha ki thied ha ka dor khyndai phew tyngka shi kilo.
Haba kylli pat ha ki nongrep la ki kham sngew lah ban die ïa u bym pat ryngkhiang ne ki kham lah ban die ynda u la ryngkhiang, don kiba ong ba lada ka dor jong u ba dang shu kheit ka kham kiew te lah kaba die ïa u bym pat rkhiang, namar lada u ba dang im u khia shiphew kilo lada u la ryngkhiang u lah ban don satang saw haduh san.
Nalor kata ki la ong ruh ba ka ïew synsar ka dei ka ïew ka bym thikna naduh mynshuwa, namar don teng teng ha kajuh ka sngi u kylla ka dor lada mynstep ka don ka poi shispah shi kilo, janmiet pat ka poi satang sanphew haduh hynriew phew tyngka shi kilo.
Ki la ong ruh ba lada ka mariang ka dum sngi lynter ka shitom bha ban sumar, namar lada sngem umjer ne hap slap u synsar u kylla rong noh bad ka dor ruh ka hiar. Ki la ong ruh ba haba kit had pynryngkhiang bad iehnoh ha ka por mynmiet, ki hap ban da tap da ki jaiñ jri khnang ban lait na ka jingsngem umjer.
Haba phai ha ka rep synsar ym lah ban len ba ka dei ka kam rep kaba kham suk, namar haba thung ruh tang shi sien bad ym da donkam than ban pynkhuid ïa ki sañium haba u jingthung u la san, lait noh tang hadien ar ne lai snem la hap ban pom noh ïa ki tynrai, kata hadien ba la dep kheit bad sat hang da ka ding hadien shi bnai khnang ba u jingthung un kham sei bha.
Ym lah ban len ba watla ka kak rep synsar ka dei kaba suk, hynrei ka long pat ka kam rep kaba shu khalai nusib namar lada dei ki snem ba ka jingdawa ka duna ka dor thied ka lah ban poi tang san haduh shiphew tyngka shi kilo. Ha kajuh ka por u synsar u dei u jingthung u ba kham pher na kiwei pat ki jait jingthung, namar ha ki jaka rep synsar ka khyndew ka tyrkhong bha bad ki umpohliew ruh ki rngad, ki dieng ki siej ruh kim lah shuh ban mih haba la rep ïa utei u jingthung.
