Nongstoiñ, K’lyngkot, 13: “Kane kan dei ka sngi ka ban sah jingkynmaw ha kaba ïa ki jingphohsniew ba la slem jong phi la pynurlong”, ong u bah Macmillan Byrsat Chairman MLA jong ka Nongstoiñ Constituency, haba ai jingkren kum u kongsan ha ka jingplie ïa u mawnongrim ban kyntiew kyrdan noh ïa ka Nongkynjang Sub Center sha ka Primary Health Center mynta ka sngi, ha ka jingïadonlang jong ki Sordar shnong bad ki nongshong shnong jong ka Lai Lyngdoh Area.
U la ong, “Phi dei ka thaiñ kaba donbok namar la arphew snem tam ba phi la ïa ksaid, hynrei mynta ka kynti ka la urlong bad ka dei barabor ka jingïatreilang jong ki nongïalam shnong bad ki paid nongshong shnong ban pyntyllun ïa ki kam pynroi pynpar ha ka dong bad ka thaiñ”.
“Ngi dei ban peit barabor ïa kaba bha ym ïa kaba sniew bad ban ïatreilang bad ki nongsynshar, la ka long ha shnong ne ha ka hima, khnang ban wanrah ïa ka roi ka par kaba sted. Ka Sorkar ka la mang 9 klur 78 lak ban pynlut ha ka ban kyntiew kyrdan ïa kane ka Sub Center sha ka PHC. Nga kular ruh ban phah pyndep noh hapoh ka shiphew bnai. Ai ba ka kam kan trei kham jam ban ïa ka ktien”, u la ong.
Kiwei kiba la ai jingkren ki long ka Dr. S.A. Lyngdoh DMHO kaba la pynïaid ïa ka jingïalang, u Dr T Syiem ba la ai ïa ka jingkren pdiang, u bah J Shangrit bad bah H.S Shangrit ki Sordar shnong Nongkynjang bad Nongkhlaw bad Dr. R Marweiñ ba la ai ïa ka jingkren khublei pynwai.
