Nongstoiñ, K’lyngkot, 13: Ki khun samla jong ka shnong Pyndengrei kawei na ki shnong kaba don hapoh sor Nongstoiñ, mynta ka sngi ki la ïoh ban ïaleh kmen sngewbha kum shi bynta ban rakhe ïa u Mawmer jong ka jingkynjoh sha ki 50 snem ka jingdap jong ka Pyndengrei Social and Cultural Sport Club kaba la long ruh ka Jubili Ksiar.
Ha kane ka sngi la ioh ban pynhap lama noh ïa ka sngi kyrpang jong ki samla, ha kaba u bah Macmillan Byrsat MLA ka Nongstoin Konstitwensi u la long kum u kongsan, ha ryngkat ka jingïadonlang ruh u bah Gabriel Wahlang MDC ka Nongstoiñ kum u symbud kongsan.
Ha kane ka sngi pynkut jong ki samla ka shnong Pyndengrei ïa ka jingrakhe, ka la long kaba la ishongkun bad shongshit bha ha kaba ki la don ruh shibun ki jingpynbyrngia na ka bynta ki khun shnong, ba ki la ïoh ban ïashimbynta da ki jingïalehkai kiba bun jait kynthup naduh ka Mawpoiñ, ka jingïatan Tyllai, Kynjatbol, Basketball, Volleyball, ki jingrwai jingshad bad kiwei kiwei. Ka Club ha kane ka sngi ka la ïoh ruh ban pyllait paidbah ïa ka souvenir jong ka Club.
