Buh Mawnongrim u Bah Renikton kynthup ïa ki surok Border bad jingtei ïa ka ïing treikam ba thymmai jong u BDO

Mawkyrwat, K’lyngkot, 13: U bah Renikton Lyngdoh Tongkhar u Myntri ba dei peit ia ka tnat umbam umdih bad kiwei jong ka Jylla Meghalaya, mynta ka sngi u la ïoh ban plie paidbah ia ki mawnongrim jong ki skhim pynroi ha ka ban shna ïa ki surok bad kumjuh ruh ban shna ïa ka ïing treikam ba thymmai jong ka ophis u Block Development Officer (BDO), Mawkyrwat C&RD Block ha ka jingïadonlang u bah T. Lyngwa, IAS, Deputy Commissioner, South West Khasi Hills District ha kaba ïa ka jingïalang la pynlong hapoh jong ka Multipurpose Hall, DC’s Office, Laitlawsang.
Ki mawnongrim ba la buh mynta ka sngi ki long 10 tylli kum ha ka ban shna bad pynbha ïa ki surok kaba kot haduh T. 11 klur tam kiba kynthup ïa ka surok na Domtiehsaw sha Pyndenïawma kaba 0.520 km, na ka surok bah ha Rangmaw kaba 1 km, ka surok jong ka Nongshillong – Jakrem kaba 0 – 21 km ba hap ha ki jaka jong ka 15 shaduh 21 km bad ka jingshna ïa ka kynroh, ki jingker bad ki muri ha kitei ki jaka, ka surok na Mawsyntai ban pynïasoh bad ka surok bah kaba 8 km bad kaba ïaid lyngba ka Kremjaruh kaba 0.85 km.
Nangta, ka surok na ka 3 km jong ka Shngimawleiñ – Sohma sha Rngikseh kaba 1 km, ka surok jong ka shnong Domjyrti kaba 1 km, na Karbom – Mawranglang kaba 1 km CH 0-1000m, ka surok ha shnong Photjaud ba kynthup ïa ka jingshna muri kaba na ka 0.1 km ha CH 0-1000m kaba jngai 1 km, ban siang dewbilat ia ka surok ha shnong Nongsynrieh kaba hajan ka Balang Presbyterian kaba 0.390 km, ka surok na Jakrem -Ranikor kaba ïaid lyngba ka Rangthong na ka 6 haduh 12 km kaba dei 7 km kaba ka jingrben ka long 20 mm.
Kumjuh ruh ïa ki ar tylli ki mawnongrim ban shna ïa ka surok jong ka Border Area kaba mar T. 40 lak lyngba ka Rural Infrastructure Development Fund (RIDF) XXVIII jong u snem 2022-23 ban iaid na Photjaud sha Langwarai kaba 1.80 km bad na Eitser sha Mawtngam kaba 1 km bad kawei pat u mawnongrim ban tei ïa ka ïing treikam ba thymmai jong ka ophis u Block Development Officer jong ka Mawkyrwat C&RD Block kaba T. 2 klur 77 lak.
Haba kren ha ka jingïalang, u bah Renikton Lyngdoh Tongkhar u la pynpaw ka jingsngewkmen ha ka ban ïa don lang ha ka jingplie ïa kine ki skhim kiba ki paidbah jong kane ka dong ka thaiñ ki la angnud bad khmih lynti baroh shi katta da kaba ïaroh bad ai burom ïa ki nongtrei sorkar bad ki paidbah kiba la ïasnohkti lang bad ai mynsiem ïa u ban ïai pyntyllun ïa ki kam kiba bun hapoh jong ka konstiwensi bad ban ïoh pyndep ïa ki kam ha ka por kaba biang na ka bynta ban kyntiew ïa ka roi ka par ha ka distrik. “Ka jingbuh ïa ki mawnongrim jong kine ki surok kan long kawei na ki lad jingïarap bad ka jingkyrkhu ïa ki paidbah jong ki shnong ki thaw ha kaba ka surok ka dei kawei na u bud lum jong ka ïoh ka kot”, ong u bah Renik. U la pynpaw ruh ïa ka jingkmen ban ïohi ïa ka jingïaid shaphrang jong ka kam da kaba kyrmen ruh ba kan ym don kano kano ka jingsahteng ha ki rukom treikam.
Haba ïa dei bad ka jingtei ïa ka ïing treikam jong u BDO, na ka liang u bah Renikton u la pynpaw ka jingaikhublei ba kyrpang ruh ïa u Myntri ba dei peit ïa ka C&RD Department jong ka Sorkar Jylla ha kaba u la bhah kyrpang na ka bynta kane ka kam ka ban long ka jingmyntoi ïa ki paidbah jong ka dong ka thaiñ bad ba ki nongtrei ruh kin ïoh ban pyntyllun ïa ki kam kiba bun.
U bah Renikton ha ka jingkren jong u, u la pynpaw ruh ka jingsngewnguh kaba kyrpang ïa ki ophisar jong ka distrik kiba la ju long ka daw jong ka jingjop ha ka ban pyntyllun ïa kiba bun ki kam hapoh jong ka Mawkyrwat Constituency. Namarkata, u la kyntu ban pynneh kane ka mynsiem jong ka jingïatreilang khnang ba ka kam nangne shakhmat kan long kaba ïaid beit iaid ryntih. Ha kajuh ka por u la pan ïa ka jingïatreilang na ki paidbah jong ka Mawkyrwat Constituency khnang ba lah ban wanrah ïa ka roi ka par ha baroh ki liang bad kyrpad ruh ïa ki nongpyntrei ban pyntrei kam bad ban pyndep ha ka por ba la buh khlem pynsah teng khnang ba ki lad pynroi kin ym long leh noh ei.
U bah T. Lyngwa, IAS, Deputy Commissioner, South West Khasi Hills District u la ong ba kane ka sngi kan long ka sngi ka ban sah kynmaw ha kaba shen kin sa ïoh ban pynïeng noh ïa ka block ophis kaba long kawei na ki ophis ha kaba ki paidbah ki khmih bad peit na ka bynta ki kam pynroi. Shuh shuh u la ong ba ka jingbuh mawnongrim ïa kine ki surok kan long ka jingïarap ïa ki paidbah ha ka leit ka wan bad ka kit ka bah ka ban nang kham pynsuk shuh shuh ïa ki.
U kyrmen namarkata, bad u khmih lynti ruh ba shibun ki kam pynroi yn dang lah ban leh ha kane ka distrik lada ngi don ka mynsiem ïatreilang ha ka ban ïaid bad pyntyllun nangne shakhmat na ka bynta ban kyntiew ïa ka roi ka par ha ka distrik. U la kyntu ruh ïa ki paidbah ban ri bad sumar bha ïa kano kano ïa kaba ka sorkar ka wanrah na ka bynta ka roi ka par na ka bynta jong ki da kaba pyndonkam bad sumar kum la ki jong.
Ha kane ka sngi la ïadonlang ruh naduh u bah G. Kharwanlang, Superintendent of Police, South West Khasi Hills District, u bah Steveford Marweiñ, MCS, Extra Assistant Commissioner, South West Khasi Hills District, u bah S.I. Laso, Assistant Executive Engineer PWD (Roads) Mawkyrwat Sub Division bad kiwei de ki ophisar sorkar jong ka distrik.
Ïa ka jingïalang la pynïaid da u bah L.T. Tariang, MCS, Additional District Magistrate (ADM), South West Khasi Hills District bad ka jingkren ai khublei na u bah I. Lawrynñiang, MCS, Block Development Officer jong ka Mawkyrwat C&RD Block.