Ki jingdih pynbuaid ym tang ki pynjot ïa u briew hynrei ki pynjngai ruh na U Blei: Pastor P. Wanniang

Mawkyrwat, ‘Nailur, 20: Da ka jingsngew kitkhlieh na ka bynta ki samla hapoh shnong ‘poh thaw kumno ban ai jinghikai ïa ki ba kin kiar na ki jingdih kiba sniew khamtam ha kine ki sngi ba mynta la sdang ban jyllei bha u drok, ka Seng Samla Shnong Pyndensakwang (SSSP) ka la pynlong ïa ka prokram kaba la tip kum ‘Ka Youth Counselling on Teen Age Drugs Abuse’ hapoh jong ka ïing Dorbar Shnong Pyndensakwang, South West Khasi Hills District.
Ha kane ka sngi, ki nongkren bad kiba long ruh kum ki nongpynshai ki long u Pastor P. Wanniang, u bah E. Tariang, District Social Welfare Officer (DSWO), South West Khasi Hills District, bad u bah Forwardman Nongrem, President jong ka KSU South West Khasi Hills District.
U Pastor P. Wanniang ha ka jingkren jong u, u la ai jinghikai ha kaba ïa dei ka rukom ngeit niam ba kumno kum ki samla ki don ka jingïadei bad U Blei ba kum ki jaidbynriew ha ka sa-tlak ka pyrthei ki don ha la ka jong ka jong ka jingngeit, da kaba ong ba baroh ki jingdih ba pynbuaid ki long ka jingpynjot ym tang ïa ka met u briew hynrei ki long ruh ka daw jong ka pynjngai ruh ïa ki jingïadei ym tang ha ka imlang ka sahlang para briew hynrei ka pynjngai ruh wat na U Blei.
Ym tang kata, la ïoh ruh ka jingpynshai ha kaba ïa dei bad ki kyndon aiñ na u bah Forwardman Nongrem, President jong ka KSU South West Khasi Hills District bad ruh ka jingkren na u bah E. Tariang, District Social Welfare Officer (DSWO), South West Khasi Hills District.
Ha kane ka sngi kiba la wan ban ïashimbynta ki long naduh ki samla ha ryngkat ki longkmie bad ki longkpa bad ma ki ruh ki la ïoh shibun ki jingmyntoi na ki jingai jinghikai ryngkat ki jingpynshai na ki nongkren.