Nongpoh, Nailur 20: Ka tnad pulit jong ka Ri-Bhoi District mynta ka sngi kala pynshlur ïaki pulit ophisar bad kumjuh ruh ki langrut kiba la trei shitom ban ai ka jingshakri kaba bha tam ban ïakhun pyrshah ïaki kam sniew bad ban pynneh ïaka shongsuk shongsaiñ ha Ri-Bhoi District.
Ha katei ka jingïalang sam khusnam bala pynlong ha phyklaw ka ophis u SP la wan ruh ban shim bynta da ka kong Idashisha Nongrang DGP ka jylla kum ka kongsan haka jingdon lang u Superintendent of Police ka Ri Bhoi u Jagpal Singh Dhanoa, u Additional SP ka Ri Bhoi, u Bah Banralang Jyrwa bad kiwei kiwei ki pulit ophisar ka Ri Bhoi.
Nalor ka jingsam khusnam sha ki pulit kiba la ai ka jingshakri haki liang bapher bapher ban tehlakam ïaki kam sniew, naka liang ka tnad pulit kala pynkup burom ruh ïa 2 ngut ki nongïakhun kti ka tnad pulit ba kynthup ïa u UBC Alan Marbaniang bad ka WPC Wadalin Syiemiong na 6th Battalion Umran kiba la wan rah burom ïa ka tnad pulit ka jylla hadien ba kila ioh ban khur ïaka takma ksiar naka lympung ïakhun kti bala tip kum ka 73rd All India Police Wrestling Cluster 2024 kaba la long dang shen ha Lucknow.
Haba kren ha katei ka sngi, naka liang ka kong Idashisha Nongrang kala ai ka jingïaroh ïa baroh ki pulit kiba la don bynta ban ai ka jingshakri kaba bha tam bad ban trei shitom ban ïakhun ïaki kam sniew kam smeh haka district khamtam ki pulit kiba la ioh pdiang ïaki khusnam ba kin dang ai shuh shuh ka jingshakri kaba kham bha haka kam kaba ki trei naka bynta ka bha ka miat bad ka shongsuk shongsaiñ haka district.
