Nongstoiñ, Nailur 20: U biskot u dei uwei na ki mar rep ba ki paitbah ki la sdang ban ïabeh bha ban rep, hynrei u dei pat u mar rep u ba ka ïew ka dor ïew dor hat ka long thik kumba khalai nusip teng teng ïoh nong teng teng duh nong.
Kaba lyngngoh ka long ba ha ki sngi ba ki nongrep ki dang sdang ban pynmih nyngkong, ka dor ïew dor hat ka poi hynriewphew haduh hynñiewphew tyngka shi kilo. Hynrei tang hadien shitaïew ka dor ka hiar sha ka sanphew haduh sawphew tyngka shi kilo.
Nalor kata shisien ba ka la sdang ban hiar ka hiar sted bha bad tang hapoh ar sngi ka lah ban hiar sha ka laiphew haduh arphew tyngka shi kilo. Ynda la mih u bnai Nailur, ka jinghiar dor ka la long ka bym sngew lah ngeit shuh, namar dang ha kane ka taïew ba la dep, ka dor ka la hiar haduh ar tyngka shi kilo ha kaba ki nongrep biskot ha kylleng ki bynta jong ka West Khasi bad Eastern West Khasi Hills, ki la bynñiaw bad lynga namar ym don mahajon kiba wan ban thied.
Watla ka dor ka mur ka la hiar haduh katta hynrei dang ha ka sngi balang ba la dep ka dor ka la sdang ban kiew biang bad ka la poi kumba san tyngka shi kilo. Ka kong A.Wahlang kawei na ki nongrep biskot, ka la ong ba ha ka taïew ba la dep ka la duh jingkyrmen haduh katta katta namar ba ka la rep bun bha. Hynrei mar shu ïoh jingtip na ki nongkhaïi ba ka dor ka la kiew san tyngka shi kilo ka la kham sngew syaid ka mynsiem.
Katei ka longkmie ka la ong ruh ba ka jingbym neh jong ka dor ïew jong u biskot, ka dei namar ba la bun than ki nongrep bad ha ka por ba ki ïoh pahuh bha ki nongkhaïi ki shu khñiot ïa ka dor katba ki sngewbit. Hynrei ynda la sdang duna ka jingpynmih biskot pat ki la sdang ban pynkiew dor biang, namar lada kim pynkiew dor kin ym ïoh mar satia.
Ban ïa kaba die ar tyngka shi kilo ka bha ban ai bam sniang ne ki mat pyut ei ha khyndew, namar u biskot haba u la ïaw bha u pdang bad mih shylluid ha u jyntang bad hadien shi taïew ar taïew u hap noh. Ka la ong ruh ba nangne sha khmat u lah ban kiew biang sa sha ka shiphew tyngka shi kilo namar ha kine ki sngi ka jingsoh u bisot ka la sdang duna bha.
