Ki jaka trei ba shngaiñ bad ka koit ka khiah ïatai ka skulbah MGU ha ka International Conference

Nongpoh, Rymphang 12: Ka skulbah Mahatma Gandhi University, Meghalaya kala pynlong ïaka prokram International Conference ba 2 sngi ban ïatai bad thir sani halor ki jaka trei ba shngaiñ, ka koit ka khiah bad ki jingsumar, katkum ka thong jong ka Vikasit Bharat 2047 bala pynlong haka 10 bad 11 tarik mynta u bnai hapoh katei ka skulbah ryngkat ka jingïatreilang bad ka Regional Labour Institute, Shillong, hapoh ka Ministry of Labour and Employment jong ka sorkar India.
Ha katei ka International Conference la wan ruh ban shim bynta da ki riew pawkhmat, ki khraw pyrkhat na kylleng ka ri India bad ki ri ka pyrthei ban ïathir ïatai halor ki jaka trei kiba shngaiñ bad kumno ban pynjanai ban pyntreikam haka ri India da kaba pyndonkam ruh da ki kor ki bor bad ki jingstad katkum ka jingïaid jong ka por, khamtam ban pynïasoh bad ka thong jong ka Vikasit Bharat 2047 ha kaba kila don shibun ki jingïathir ïatai bad pyninam ruh kumba 46 tylli ki kot wad bñiah bala thoh da ki khraw pyrkhat.
Ha katei ka jingïalang ba 2 sngi nalor ki khraw pyrkhat bad ki riew pawkhmat na kylleng ka ri India bad ki ri ka pyrthei, la wan ruh ban shim bynta da u Dr. Rajan Chopra Chancellor, Prof. (Dr.) Sagar Onkarrao Manjare Vice-Chancellor, Dr. Sarika Dixit Registrar, bad u Dr. Mohan Bhattacharya Advisor bad ïa katei ka jingïalang la lamkhmat da u Dr. Yeduru Krishna Reddy Dean, Allied Health Science ba dei ruh u convenor, Dr. Priyanka Goswami HOD, Physiotherapy, Co-Convenors bad u Prof. Suman Deka HOD, MLT bad kiwei kiwei lem bad ki samla pule.
Lyngba katei ka jingïalang bah la khmih lynti ruh ban wanrah shibun ki jingkylla ba yn lah ban pyntreikam haki jaka trei bapher bapher khamtam ka jingshngaiñ jong ki jaka trei, ba kin long ruh ki jaka kiba koit ba khiah bad khamtam kiba lah ban kyntiew ïaka rukom treikam katkum ka thong jong ka Vikasit Bharat 2047.