Bun ki ïalam bakla ba dei ban jied tang kiba hap sohpet ha Ri-Bhoi, hynrei bun kiba hap ha Lawmali: Donlang Sohkhlet

Nongpoh, Rymphang 12: U Bah Donlang Sohkhlet, uwei naki riew rangbah naka thaiñ Umsning u ba la ïakhun teng ruh ïaka elekshon MLA na Umsning Constituency, u ba la pynïasoh ïalade bad ka party NPP haba kren haka jingïalang ban pan kyrshan naka bynta ka kong Macdalyne S Mawlong ha Umsning ha kane ka elekshon MDC ban wan mynta ka sngi u ka khyrwit tyngeh ïaki briew kiba ju kynnoh bad kynthoh ïaka party NPP laiphew jait lai phew rukom, ba ka dei ka party bamsap, ka party bym treikam, ka party High Level, hynrei dei kane ka party kaba la leh shibun bah ki kam ba khraw, khamtam ban pynlong aiñ ïaki aiñ bapher bapher ha District Council.
U la ong ruh ba ki paidbah ki sdang ban ïalam bakla ba dei tang ki briew ba hap sohpet ha Ri-Bhoi kiba lah ban mihkhmat ïaka them Ri-Bhoi hynrei haba peit ïaka record bun kiba hap sohpet ha Lawmali, ha Robert Hospital, namar haki por ba mynshuwa ka Ri-Bhoi kam pat don ki jaka sumar kiba biang bad wat u Maduh Prestone ruh ngam tharai ba un hap sohpet ha Pynursla bad kane ka dei tang ka jingpynpait pynpra namar la bun palat kiba ïeid jaitbynriew kiba shu hylla jan pait sa u ryndang, tang ha surok kam myntoi khlem ki kam namar lada ïeid ïaka jaitbynriew dei ban sdang nala rympei, na shnong na thaw bad kumta ter ter.
Kum uwei naki riew rangbah naka thaiñ Umsning u la ong ruh ba ka Kong Macdalyne ka dei ka kyrtong kaba la trei bun ki kam ha Umsning hakine ki 6 snem bala leit noh, bad dang donkam ïa katei ka longkmie ba kan shim biang ïaka lyngkor kum ka MDC ha kane ka kynti ba mynta.