Ki 5 ngut kin ym wan phai shuh bad ka Congress kam pdiang shuh hi ruh ïa ki: Pynshngaiñ

Shillong, Risaw 7 : U Working President ka Congress u bah Pynshngainlang N Syiem mynta ka Sngi Thohdieng u la ong ba ki san ngut ki MLA jongka Congress ki khlem ai dak shuh ba kin dang wan phai sha ka Party bad lada ki wan phai ruh ka Congress kan ym pdiang shuh hi ïa ki.
“ Kumba ki khlem ai dak ba kin dang wan phai kumjuh ruh ka Congress ka khlem ai dak ba kan dang pdiang biang ïa ki lada ki wan phai ruh” ong u bah Syiem haba kylli kumno ka party ka rai na ka bynta ki 5 ngut ki MLA jongka ha kane ka election MLA 2023.
“ Namar ba ka Election ruh ka la jan ngi kwah ban pynkhreh bha ba ngin ïaid ha ka lynti kaba biang ban ïakhun ïa kane ka election 2023. Kumta ngim don por shuh ban dang phai khmat sha kitei ki san ngut ki MLA kiba la shah sospon ha ka party. Kaba ngi pynkhreh mynta ka long ba ngin hap shut nep bha ïa ki reng jong ki kyrtong jong ngi ki ban ïa ai reng ha kane ka election 2023” ong biang u bah P.N Syiem.
Haba la kylli hato ka Congress kan weng noh shi syndon ïa ka jinglong dkhot jongki, u bah Pyshngain u la ong “Kane ka kam beh seng kam shong ha ka MPCC. Ka shong ha ka AICC bad ngi ïeh ha ka jingstad jongka AICC ban shim ïaka rai”.
Ki san ngut ki MLA kiba la shah sospon naduh ka 27 tarik Iaiong 2022 ki long kong Ampareen Lyngdoh MLA ka East Shillong, bah Mayralbord Syiem MLA ka Nongpoh, bah P.T Sawkmie MLA ka Mawlai, bah Mohendro Rapsang MLA ka West Shillong bad bah Kimfa S Marbaniang MLA ka Rambrai- Jyrngam. Kine baroh mynta ki ai ka jingkyrshan kaba khlem buh kyndon ïa kane ka sorkar MDA bad dei ruh halor kane ka nongrim ba ki kyrshan ïa kane ka sorkar khlem da ïoh jingmynjur na ka MPCC ba ki sa shah sospon namar ba ka BJP ruh ka ïatrei lang ha kane ka sorkar MDA.