Shillong, Risaw 7 : Kum shi bynta ban sdang noh ïa ka Special Summary Revision (SSR) ne ka jingpynrung kyrteng ha ka Electoral Roll na ka bynta ka Election MLA 2023 ka ophis jongu Chief Electoral Officer (CEO) ha ka jingïatrei lang bad ka ophis jongka Deputy Commissioner East Khasi Hills ki la pynlong ïa ka Electoral Outreach Programme (EOP) mynta ka sngi ha Umpling.
Ka thong ka long ban ïatrei lang bad ki bor synshar shnong ba kin ïarap ban pynsngewethuh sha ki paid nongshong shnong ïa ka jingdonkam ban pynrung kyrteng ïa lade haba ki la dap ka rta ban ïoh thep vote. Kane ka jingsdang da kane ka prokram ka long kyrpang ïïakito ki jaka kiba ka jingpynrung kyrteng ka duna bad poi tang kumba 20 % ei ei khamtam eh ha kine ki jaka sor.
Kane ka jingduna ban pynrung kyrteng ka la pynsngewdiaw bha ïa ki bor pynïaid ka election bad na kata ka daw ki pynlong noh da ka prokram ba kyrpang ban ïatrei lang bad ki bor shnong khnang ba yn lah ban pynsngewthuh ha ki khun samla ba dang shu dap ka rta ban ïoh thep vote ba kin shim khia ban pynrung kyrteng ïalade namar ka shi vote ka jongki ka long kaba kongsan tam ha ka por election. ïa kaba kum kane ka prokram yn pynlong ha kylleng ki district bad kumjuh ruh ha Jowai bad Tura.
Da kaba jer kyrteng RolltoPoll “ Mission Unite 2.0” la pynlong ïa kane ka prokram mynta ka sngi ha Umpling Dongrum ha ka jingïadon lang ki khun samla, ki dkhot seng kynthei, seng samla, ki rangbah. La ïadon lang ruh u CEO bah Frederick R Kharkongor uba la shim khia ban pynsngewthuh ïa baroh na ka bynta ka jingdonkam ban pynrung kyrteng bad ban leit thep vote. U la batai ruh ïa ka phang RolltoPoll kaba dei ka thong jongka Election Commission of India (ECI) ban peit ba yn ym don uwei ruh u nongthep vote u bym rung kyrteng ha ka Electoral Roll kynthup ïa kiba don jingduna ki dkhot met ruh.
La ïadon lang ruh u Rangbah Shnong bah Sawwat F Pyngrope, Secretary Shnong Umpling, ki dkhot ka Executive Committee, ki ophisar na ka ophis u CEO, na ka ophis DC.
U Rangbah Shnong ula pynpaw ïa ka jinglong kloi jongka shnong ban ïatrei lang bad ka ophis u CEO bad DC ban pynrung kyrteng ïa kiba dang shu ïoh thep vote ha kane ka kynti.
