Da lade hi ngan ym hiar shuki da lei lei ruh, ong u Ba Lahkmen

Shillong, Risaw 7 : U Myntri ka tnad pule puthi uba bat ruh ïa ka tnad kam pohïing u ma Lahkmen Rymbui u la kren shai mynta ka sngi Thohdieng ba da lade hi da lei lei ruh un ym hiar na ka shuki myntri sorkar.
“ Hooid ka kyrdan ne shuki ha nga ka wan ba ar, nga lah ban shakri la nga don ha kano kano ka bynta ruh hynrei ban hukum ïa nga ba ngan hiar shuki te da lei lei ruh ngam ym leh bad ngan ym lah pdiang hi ruh” ong u bah Lahkmen.
U la kren shai ïa kane halor ka jingdawa ki seng bhalang bad wat ki katto katne ngut kita kiba kam ba ki dei ki nongialam ka UDP ki bym nud pat ban pynpaw kyrteng namar ba ki dei ki ksan rympei rem dorbar ba u dei ban hiar shuki noh hadien ba ki bor pulit ki la kawang tear gas ïa ki nonghikai kontrak ha ka Sngi Palei ha ka por ba ki tur sha Secretariat.
U ma Lahkmen u la ong ba un ym hiar shuki satia namar kaei kaei kaba la jia kam dei ka jingleh jongu. “ Balei ngan shu hiar shuki nga don ha kane ka shuki ym ban randien hynrei ban shakri bad ïai shakri bad peit ïa ka bha ka miat jongka jylla bad ki paidbah” ong biang u ma Lahkmen.
Haba u kyntait ba u shah pynlong langknia marwei, u ma Lahkmen u la ong “ Ngi don hangne ban ïatrei lang ha ka sorkar ban peit ïa kiba bun ki jingeh ha ka jylla. Kam dei kumba la shu don kiba kynnoh ba nga long langknia hynrei la ka long kumno kumno ruh ngin ïai ïatrei lang ïa kaei kaba ngi lah ban leh ngin leh bad ïa kaei kaba ngim lah ruh ngin ong beit ym lah ban leh” ong shuh shuh u Myntri ka tnad kam pohïing.
Halor ka jingkynnoh jong ka Liang Pyrshah ka AITC ba ka sorkar MDA ka la ñiewbeiñ ïa ki nonghikai, u ma Lahkmen u la ong “ Ngi khlem leh beiñ ïa ki nonghikai. Naduh ka sngi ba nyngkong ngi la dep pynshai ba ngi hap ban bud ïa ki kyndon ba la buh da ka sorkar pdeng, ngi la ai por ïa ki bad ki la pynjlan ruh wat ïa ka rta thung kam na ka bynta jongki bad mynta ruh la ai lang biang sa shisien ba kin ïaleh ïa ka MTET kumta ban ong ñiew beiñ ne leh beiñ kam dei satia”.