Da ki jaiñ kyrshah leit bret ka HITO ha Secretariat, dawa wengkam shipor ruh ïa ki Pulit

Shillong, Risaw 07: Ka Hynñiewtrep Integrated Territorial Organization (HITO) ha ka sngi Thohdieng ka la leit ban bret da ki jaiñ ha Secretariat ban pynpaw ïa ka jingpynrem jur ïa u Myntri ka tnat ki Kam Poh Ïing ka Sorkar jylla u Bah Lahkmen Rymbui halor ka jingsiat bom pynsat khmat ïa ki nonghikai ha ka jimngleit tur jong ki sha Secretariat bad ka la dawa ruh ba ka sorkar ka dei ban weng kam shipor ïa ki Pulit kiba donkti ha kane ka jingpynbthei bom sat klhmat.
Ha kane ka jingleit bret jaiñ kyrshah ka HITO ka la pyrta ruh ïa ki slogan jingpynrem ïa u Myntri ka Tnat ki kam poh ïing u ba bat ruh ïa ka tnat pule puthi, ïa ki pulit kiba donkti ban siat bom pynsat khmat bad ruh ïa ka sorkar hi baroh kawei.
Ha ka jingïakren bad ki lad pathai khubor u Bah Donbok Dkhar President ka HITO u la ong ba kaei kaba ki pulit ki la leh ka long ka kam khawpud khlem kheiñ shuh ïa ki nonghikai kynthei bad ki khunlung khynnah kiba shim bynta ha kane ka jingtur sha Secretariat.
“Ka jingwan bret ïa kine ki jaiñ ka long ban pyni ba u Myntri bad ki pulit hi ki dei ban kup noh da ka jaiñ kyrshah namar lada ki dei ki shynrang kumno ki nud ban leh ïa ki longkmie ha kato ka rukom” u la ong.
U la ïathuh ruh ba ha ka jingïakynduh bad u Bah Lahkmen Rymbui u la dep ban kren da kaba shai ba ka sorkar ka dei ban weng kam shipor ïa kine ki pulit bad pynngat ruh ha ki kyndon jong ka aiñ namar kaei kaba ki leh ka long kaba be-aiñ.
U la ong ruh ba na ka liang u Myntri u la kular ba un sa pan ïa ka kaiphot na ki Pulit bad ki bor synshar District halor ka jingsiat bom pynsat khmat jong ki ha ka sngi Palei pyrshah ïa ki nonghikai kontrak
Shuh shuh u la ïathuh ba na ka liang jong ka HITO ka la ai por ïa ka sorkar haduh lah sngi U Blei ba kan leh ïa kane lada na ka liang jong ka kam sngap ïa ka jingdawa jong ki na ka liang ka seng kan sa shim da ki sienjam kiba tyngeh ban ïakhih pyrshah ïa kaei kaba ki pulit ki la leh.
Ha kane ka sngi la sakhi ruh ba na ka liang ki dkhot ka HITO ha ka jingwan tur jong ki shilynter surok ki la pyrta jam ïa ki slogan ban pynrem ïa ka sorkar.