Khyrwit u heh BJP ïa ka NPP ba plie ïa ka PA Sangma Stadium khlem pat pyndep

Tura, Kyllalyngkot 06 : U John Barla uba dei u Union Minister of State (MoS) – minority affairs jong ka BJP hynne ka sngi Thohdieng u la leit ban jngoh ïa ka PA Sangma stadium kaba dang shu plie shen bad khyrwit ïa ka sorkar MDA hapoh ka jingïalam ka NPP kaba khlem da kdew ïa ki jingïarap na ka sorkar pdeng bad kumjuh ruh ka jingplie paidbah ïa katei ka stadium khlem da pyndep ïa ka jingtrei.
Katei ka project kaba la kot sha ka 127 klur ha kaba 90% ka wan lyngba ka sorkar pdeng bad kaba sah kadei lyngba ka sorkar jylla. Ïa katei ka stadium la ai jingïarap da ka Ministry of Minority Affairs.
Ha katei ka jingleit jongoh ha Ri Lum Garo hynne ka janmiet sngi Thohdieng ïa kaba la sdang shwa ka jingjurip ïa ka stadium ha Tura, la synrang lang da u Bah Ernest Mawrie uba dei u State President bad u MDC ka Tura u Bernard N. Marak.
“Ïa kane ka project la ai jingïarap pisa lyngba ka sorkar pdeng hynrei la plie da u Myntri Rangbah khlem da batai shai ïa ka jinglong jingman jong kane ka jaka. Ïa ka stadium ym pat shym la pyndep hynrei la dep pat ïa ka ban plie paidbah. Kane kadei tang ka jingleh politik. Kumba la ïarap pisa lyngba ka sorkar pdeng, la dei ban batai shai halor jong ka,” ong u Barla haba kren sha ki nongthoh khubor.
U la ong ba kane ka jingleh jong ka sorkar jylla ka long tang kumno ban pynbiej ïa ki paidbah.
“Ngi dei ban ïatreilang ym ban pyrshah iwei ïa iwei pat. Na ka bynta ka roi ka par jong ka jylla ngi da thrang bad angnud ban ïatreilang bad ka sorkar hynrei lada phi kyntait ïa ka jingnoh synñiang jong ka sorkar pdeng, ka jingwanrah ka jingbitar. Ki paidbah kin sa ai ïa phi ïa ka rai ha kine ki khyndiat sngi,” u la bynrap.
Shuh shuh u la pynpaw ruh halor ka jingbym biang ka jingpyntrei ïa katei ka complex da kaba ong ba u la ïohi ïa ki katto katne ki beam kiba la kdor.
Hadien ba u la ïoh sngew ba ka sorkar jylla ka la leh beiñ ïa ki 7-8 tylli ki longïing kiba don marjan bad katei ka stadium, u Barla u la leit ban jngoh bad kyntu ïa ka sorkar jylla ba kan ai ka jingïarap ïa kito ki longïing.
“Ka roi ka par kan ym wan lada ki paidbah ki mad jingeh. Ki la pyndonkam ïa ki bor pulit bad bor district ban pynkynriah ïa kitei ki longïing kaba la ktah shi katdei eh ïa ki. Mynta ki shong khlem ïing khlem sem. Lada phi la knieh noh ïa ki jaka jong ki, ki donkam ban ïoh bujli bad ka bai lutksan. Ki la pynpra lut ïa kito ki ïing bad kane ka la ktah ïa kitei ki longïing. Nga kyntu ïa ka sorkar jylla ba kan wan shakhmat ban ai ka jingïarap ïa kine ki briew kiba la shah ktah. Kane ka jingleh ka long ka bym don shuh ka jingsngew synei para briew,” la bynrap u Barla.