Ka jingshong kurim ka dei ka nongrim jong ki longïing

0

Ka jingshongkurim ka dei kawei na ki kam kaba kmen tam ïa baroh bad ka wanrah ïa ka jingkmen ym tang ia ki shijur kiba ïapoi kha, hynrei ki kmie ki kpa, ki hymmen para jong ki ar longïing bad ruh ïa ki kur ki kha bad baroh kita kiba don ka jingïadei bad kita ki shi jur. Ka dei ka aiom tlang bad ki don bun shisha ki ingïathoh shongkurim bad katno ka long kaba itynnad ban ïohi ba ki samla ki long kiba kloi ban ai ka burom sha U Blei bad wad ïa ka jingpynkyntang jong u ha kaba iadei bad kane ka kam kaba long ka bynta kaba khraw tam ha ka jingim jong u briew bad ka briew namar ba dei na kane ka bynta ba kin sdang ban tei ia la ka jong ka longïing ban ban don ia ki khun ki kti ki ban long ka lawei jong ka longïing, ka kur ka jait, ka shnong ka thaw ka jaidbynriew bad ka ri.
Haba peit kumne ka i ba baroh ki biang beit, hynrei katno ka long kaba pang nud ban tip ba ki don bun bah ki longïing kiba ym lah ban bteng shuh ia kane ka jingïalong shi kurim na kiba bun ki daw bad bun na kine ki longiing ki jot noh! Ka jingjot jing pra jong kiba bun kum kitei ki longiing ka la long shisha ka jingtheh umpjah ia kiba bun ki samla bad ki longïing longsem, ha kaba ki sngew ba kam long kaba myntoi ban pynlut ïa ka por bad ka bor. Hynrei ka long kaba donkam ban sngewthuh ïa kaei ka daw tynrai jong ka jingjot jingpra noh jong ki longïing longsem khamtam kito kiba la kiew wat haduh ka duwan ba kyntang jong ka jingïathoh shongkurim. Kawei na ka daw ba kongsan kat kum ka jingwad bniah la shem ba ka dei ka jingduna palat ne ka jingbymdon ïa kata ka jingsngewrit bad sngewthuh nyngkong eh hakhmat jong U Blei bad ka jingjngai noh jong ka jingïadei kaba jan bad U Trai nongbuh nongthaw. Kane suki suki ka kjap ia ka jingiadei nyngkong eh bad u Trai nongthaw bad hadien kata hapdeng jong ki shijur ha kiba ki ju mih shibun kidaw kiba wat i daw barit eh ruh i kylla long ka ding kaba bamduh.
Haba wad jingtip ia ka daw jong ka jingtlot ka jingaidei jong ki shijur kiba la dep ban ïateh kular hakhmat U Blei bad ruh kiba ieit ban shakri ïa u Blei, ia ka daw la shem ba kawei ka dei ka jingbym don ia ka por jong ka jingïamane lang kum ka longïing, ka jingbymdon jong ka por ban pule ia ka ktien U Blei bad ia duwai lang bad ka jingim ka kylla long kum ki riew madan bad ki riew paidbah. Wat la kum ki shi kurim ki long kawei ka doh kumba ong ka ktien U Blei, hynrei ka mynsiem pat ka long la ka jong ka jong. Ka jingbymïoh ia ka por ban long kawei ka mynsiem ka mih na kiba bun ki jingeh jong ka jingbymïasngewthuh jingmut bad ka jingnoh shilliang jong ka jingieit kaba lah ban dei na ka daw jong ka jingbym ïaryngkat ha ka kamai kajih, ka kyrdan long briew, ka jingban khia ka kam bad kawei kaba sniew tam eh ka dei ka jingbymshaniah iwei ïa iwei pat.
Kum ki briew kiba la shong kurim ym donkam than eh ban batai stad da kiwei ïa kaei kaba ki dei ban leh bad ia kaei ka bymdei. Hynrei kum ki briew hi ym lah lait na ka jinglong sahdien ha ka bor pyrkhat pyrdaiñ bad don pat ruh kiba la ïastad palat bad kum kine ruh ki buh jingeh shibun. Hooid ym lah ban leh ba ym baroh ki longïing ki pait ki pra namar ba ki don ki longïing wat ki bym ithuh tang ia ka ïing mane ruh ne ki bym dei ki khristan ruh hynrei ki shongsuk shongsaiñ bad ïaid lyngba ka jingim. Hynrei kaba kham sngewsih ka long ba kita pynban ki longïing kiba kam ba ki tip bad ithuh ia u Blei hynrei kum kitei ki jingjot jingpra ki jia. Ka kam shongkha shongman ka long shisha kaba jwat bad tang kito kiba ïaid lyngba ki tip ïa kata. Hynrei kawei na ka jingshisha bad ka jingphla wat na kita kiba shakri ïa ka kam U Blei ruh, ka long ba ka jingjot jingpra ka jia dei na kadaw jong ka jinglehsting ha jingïadei bad U Blei khamtam ba kam don ka jingïashakri Blei ha ka jingiatylli (Salm 127, 133, Ioanis 10:10).
Ka jingshong kurim ka dei ka plan jong u Blei na ka bynta ki briew bad ka dei ka bynta kaba U Blei hi u sngewbha eh ba dei na kata ka daw ngi iohi ba wat ia ka kambah kaba nyngkong eh ba u Jisu u la leh, ka long ban pynkylla waiñ ia ka um ha ka jingshongkurim ha Kana (Ioanis 2:7-9). Kumta lada ki don kino kino ki longiing khristan kiba ïakynduh jingeh bad ka shongkha shongman ka dei ka por ba kin phai pat sha u Blei uba long u nongseng bad u nongpynlong ïa ka shongkurim da kaba pynrit hakhmat jong u bad wad ïa ka jingiasyllok bad u Blei bad kumjuh ruh lyngba ka jingïarap jong ki nongialam Balang lada donkam. Ka jingshongkurim ka dei shisha ka nongrim ka imlang sahlang bad ka Baibl ka ong “Lada pynduhnnoh ia ka nongrim uba hok un lah leh aiu” Salm 11:3)

Leave A Reply

Your email address will not be published.