Khynra ka tnad Excise Ri Bhoi ïa ka Karkhana shna kyiad be-ain ha Rajabagan, Byrnihat
Shah kem 12 ngut bad 2 ngut ki nongpeit
Nongpoh, Jylliew 26: Ka tnad Excise Ri Bhoi ba la lamkhmat da u Superintendent of Excise Bah R.C Lyngdoh bad ka kynhun ha ryngkat ka jingïarap ka tnad Excise na Assam, ha ka sngi Baar kumba ha ka por 3:00 baje tam noh sngi ki la leit ban khynra ïa kawei ka Karkhana ba la kynnoh shna kyiad be-aiñ ha ka shnong Rajabagan, Byrnihat, Meghalaya.
Kane ka jingleit da khynra ka tnad Excise, ka long hadien ba ki la ioh jingtip halor kane ka Karkhana kaba la shna kyiad beaiñ khlem don ka laisen bad khlem da iohbor na ka tnad Excise jong ka Sorkar Meghalaya.
Ha ka jingkhynra ïa ka Karkhana la lap ba ka don ka jingshna kyiad bad song kyiad beaiñ bad ka tnad Excise ka la kurup ïa ka kyiad bad ki tiar ki tar bad kem ruh 12 ngut ki nongtrei bad ar ngut ki nongpeit jong ka Karkhana.
Ki bor shnong ka Rajabagan ki la kam ruh ba kam don jingtip bad ïa kane la ïathuh da u Rangbah Shnong Anant Timung.
U la ïathuh ruh ha ka jingshisha kane ka Karkhana la khang khyrdep naduh u snem 2018, ha kata ka por ki shna ïa ki Cashew Nut bad ka bor shnong ka dang pyrkhat ba la khang khyrdep naduh u snem 2018 bad ha kane ka kynti pat la ioh jingtip pynban ba ki shna kyiad be-aiñ ha kaba wat ka No Objection Certificate (NoC) kim shym la ioh na ka bor shnong Rajabagan.
Haba ïakren ruh bad u Superintendent ka tnad Excise, u Bah R.C Lyngdoh u la ong ruh ba ka tnad Excise ka la hap ban khynra ïa kane ka Karkhana hadien ba la ioh jingtip ba la pynlong kum ka Karkhana shna kyiad bad khlem da don ka License bad ioh bor na ka tnad Excise ka Sorkar Jylla.
U la ong ruh hadien ba la lap ïa kine ki kam beain la kurup noh ïa ki tiar ki tiar bad ka kyiad bad la kem ruh ïa ki nongtrei na ka bynta ban pynlong ïa ka jingtohkit.
U la ong ruh ba ka jingdon kum kine ki Kharkhana beaiñ ka la wanrah ïa ka jingduhnong ka jingïohlum khajna ka Sorkar Jylla bad ka tnat ka hap ban shim da ki lad kiba tyngeh ban khanglad kum ïa kine ki Karkhana beaiñ khnang ba ka Sorkar kan ym duhnong ha ka liang ka Khajna bad hap leh ruh katkum ki kyndon jong ka aiñ.