Khlad noh u CEM barim ka KHADC Bah Teiñwell Dkhar

Shillong, Jylliew 26 : U Chief Executive Member barim ka KHADC, Bah Teinwell Dkhar ba dei ruh u MDC ba mynta ka Shella u la khlad noh ha ka sngi Balang hadien ka jingshitom kaba la bat ïa u kumba katto katne por.
Une u rangbah ba dang 62 snem ka rta u la jop nyngkong kum u MDC ka Shella constituency ha u snem 2004 bad ïai neh kum u nongmihkhmat ka thaiñ haduh ki sngi kiba khatduh jong u.
Ha ki saw samoi kum u MDC, u Bah Teinwell u la ïoh ban bat lut ïa baroh ki kyrdan kiba don ha KHADC, kata kum u Lamphang jong ka Ïing Dorbar Thawaiñ District Council, nangta kum u Nongïalam ka Liang Ïatei (Leader of Opposition) bad ruh kum u CEM.
Katkum ka jingïathuh da u Working President ka UDP ba dei ruh u Nongïalam ka Liang Pyrshah ha KHADC bad MDC ka Sohra, Bah Titos W Chyne u la ong ba ïa ka met ba sah jong une u rangbah ba la slem bha ha ka saiñpyrthei ha ka Council yn sa leh burom khatduh ha ka sngi Thohdieng, ka 28tarik mynta u bnai ha ïing sah jong u ha Mawlong.
Kum ka dak ka jingburom ïa ka jingnoh synñiang jong une u rangbah, ka Executive Committee jong ka KHADC ka la pynbna ban ai shuti shiteng sngi ha ka 28tarik Jylliew ha baroh ki ophis treikam jong ka Council kaba dei ka sngi ontep ïa u.
Ha kajuh ka por na ka liang u Chairman ka KHADC, Bah Lamphrang Blah kumjuh u Deputy Chief Executive Member Bah Pynshngaiñ N Syiem ki phah ka jingsngewlem sha i kurim bad sha ki khun ki kti kumjuh sha ki bahaïing ha sem jong une u rangbah.