Mawkyrwat, Jylliew 26: Ka kong (Dr) Ampareen Lyngdoh, ka Myntri ba dei peit ïa ka Agriculture & Farmers’ Welfare Department, Health & Family Welfare Department, Information & Public Relations Department, Law Department jong ka Sorkar Meghalaya mynta ka sngi ka 26 tarik u Jylliew, 2024 ka la hiar jurip ïa ki ar tylli ki jaka sumar kata ka Shngimawleiñ Sub Center bad ka Mawthawpdah Primary Health Center kiba don hapoh ka South West Khasi Hills District.
Lah ban kdew ba ka jingwan jurip jong ka ïa ka Mawthawpdah PHC, ka dei hadien jong ka leit pynsngew jong ka Hynñiewtrep Youths Council (HYC) ha ka 13 tarik u Jylliew, 2024 ba kane ka PHC ka dang donkam shibun bah ki lad ki lynti ban nang pynïaid shaphrang ïa katei ka jaka sumar.
Hadien ka jingjurip, ka kong (Dr) Ampareen Lyngdoh haba kren ha ki lad pathai khubor ka la ong ba ka jingwan jong ka mynta ka sngi ka long hadien ka jingwan buh jingthoh da kiba bun, ha kaba ïa dei bad ki jingtreikam jong ki tnad ka koit ka khiah bad kyrpang eh ha kaba ïa dei bad kane ka Mawthawpdah PHC. Shuh shuh ka la ong ba ka jingwan jong ka mynta ka sngi ka long ruh ban pynjan bad kham pynjanai ïa ka jingtreikam ban ai jingshakri ïa ki paidbah nongshong shnong lyngba ka tnad ka koit ka khiah.
Ha kaba ïa dei bad ka jingdonkam nongtrei hapoh ka Mawthawpdah PHC, ka kong (Dr) Ampareen Lyngdoh ka la pynsngew ba katkum ka jingbhah hi ka long uwei u Doktor MBBS bad iwei i Doktor Ayush bad kynthup ïa ki staff nurse kane ka la ïaid na kawei ka Sorkar sha kawei pat, hynrei ka kular pat ba na ka jingud jong ki paidbah pat kan sa pyrshang ban thaw ki lad ki lynti.
Ha kawei pat ka liang ka kyntu jur ïa ki paidbah bad wat ju ud tang ha lyndet ba duna hangne hangtai ha ki jaka sumar hynrei da lade kin da leit mih ban shim ki lad jingïarap la ka long ban leit kha ïa ki khyllung, leit ban phah ai-tika ïa ki khyllung ha ki sub center khnang ba ka jingïaid shaphrang jong ki kan long ka jingmyntoi ïa ki paidbah.
“Nga kular ba ngan leit nangne bad ngan pyndep ïa ki kam ba ki paidbah ki la dep ban pynsngew bad buh jingkyrpad bad hadien shi bnai shiteng ne ar bnai ngan wan biang ban peit kiei ki ban jia”, ong ka kong (Dr) Ampareen Lyngdoh.
Kiba ïa don lang ha kane ka sngi ki long u bah Renikton Lyngdoh Tongkhar, MLA ka Mawkyrwat Constituency, u bah Carness Sohshang, MDC ka Mawkyrwat Constituency, u bah I. Lawrynñiang, BDO ka Mawkyrwat C&RD Block, ka Dr. F.V. Kharshi-ïing, Director jong ka Health Services (MI), Shillong, u Dr. Paul Chyne, Joint Director jong ka Health Services (MI), Shillong, lem bad kiwei de.
La pynïaid ïa ka jingïalang da u Dr. Paul A Lyngdoh, Medical & Health Officer bad In-charge ïa ka Mawthawpdah PHC, ka jingkren pdiang na u bah Arquis Dkhar, Sanitary Inspector, Mawthawpdah PHC, nangta, ka jingkren bad aiti ïa ka Memorandum da u bah Dominic Shangpliang, Myntri Laitlawsnai Cum President ka Synjuk Ki Rangbah Shnong Area Mawthawpdah bad kren khublei na ka Dr. A. Syiemsad, Ayush MO, Mawthawpdah PHC.
